Pune Rain Update : सर्वदूर संततधार

Pune Rain News : जिल्ह्यातील धरणक्षेत्रात पावसाचा जोर कमीअधिक होत आहे. घाटमाथ्यावर जोर अधिक आहे. मुळशी घाटमाथ्यावर पावसाची संततधार सुरू आहे. गुरुवारी (ता. २७) सकाळी आठ वाजेपर्यंत येथे सर्वाधिक १७७ मिलिमीटर पाऊस पडला.

गेल्या दहा ते बारा दिवसांपासून धरणक्षेत्रात मुसळधार पाऊस कोसळत आहे. मुळशी पाठोपाठ लोणावळा घाटमाथ्यावर १०७ मिलिमीटर, शिरोटा ६८, ठोकरवाडी ६१, वळवण ७७, कुंडली ६२ मिलिमीटर पाऊस पडला.

त्यामुळे भात खाचरे तुडुंब भरून वाहत आहेत. ओढे, नाले, धबधबे खळाळून वाहत आहेत. नद्यांच्या पाणीपातळीत वाढ होत आहे. सध्या मुठा खोऱ्यातील धरणक्षेत्रात मध्यम, नीरा खोऱ्यातील काही धरणक्षेत्रात हलका, तर कुकडी खोऱ्यातील धरणक्षेत्रात तुरळक सरी बरसल्या. पवना धरणक्षेत्रात ८२ मिलिमीटर पाऊस पडला. विसापूर, वीर, उजनी धरणक्षेत्रात पावसाची उघडीप होती. परंतु गुरुवारी सकाळपर्यंतच्या २४ तासांत धरणात ७.०३ टीएमसी पाण्याची आवक झाली.

धरणक्षेत्रापाठोपाठ हवेलीतील वाघोली मंडलात १४, थेऊर १२.५, उरुळीकांचन १२.८ मिलिमीटर पाऊस पडला. मुळशीतील माले ६५.८, मुठे ४५.५, घोटावडे ११ मिलिमीटर, तर पौड, थेरगाव, पिरंगुट मंडलांत तुरळक पाऊस पडला. भोरमधील निगुडघर ३७, आंबवडे २०.५, तर भोर, भोलावडे, नसरापूर, किकवी, वेळू, संगमनेर हलका पाऊस पडला.

मावळमधील काले ३७.८, कार्ला ७४.८, खडकाळा २१.३, लोणावळा ७९, शिवणे २७.८, वेल्हा येथे ९७.८, विंझर १५.३, आंबवणे येथे १०.५ मिलिमीटर, जुन्नरमधील आंबेगाव येथे ५९.३ मिलिमीटर पाऊस पडला. जुन्नर, खेड, शिरूर, बारामती, इंदापूर, दौंड, पुरंदर येथेही पाऊस झाला.

‘खडकवासला’, ‘कासारसाई’तून विसर्ग

खडकवासला धरण ९७ टक्के भरले आहे. गुरुवारी (ता. २७) संध्याकाळी खडकवासला धरणातून ८५६ क्युसेक पाण्याचा विसर्ग सोडण्यात आला. तसेच कासारसाई धरण ८७ टक्के क्षमतेने भरले आहे. या धरणाच्या सांडव्यावरून विसर्ग सुरू करण्यात आला. त्यामुळे नागरिकांनी नदी पात्रात उतरू नये, आवश्यक ती खबरदारी घ्यावी, असे आवाहन जिल्हा प्रशासनाने केले आहे.