सातारा : जिल्ह्यात सप्टेंबरमध्ये झालेल्या ढगफुटीसदृश पावसामुळे (Cloudburst Rainfall) जिल्ह्यातील दोन हजार ९४३ हेक्टर क्षेत्रावरील खरीप पिकांचे (Kharif Crop Damage) मोठे नुकसान झाले आहे. याचा सर्वाधिक फटका सातारा, जावळी, कोरेगाव, वाई, महाबळेश्‍वर व पाटण तालुक्यांतील सुमारे आठ हजार ७३५ शेतकऱ्यांना बसला आहे.

पिकांचे पंचनामे पूर्ण झाले असून, पाच कोटी २२ लाख ६८ हजार रुपयांचे नुकसान झाले आहे. नुकसान भरपाईचा प्रस्ताव शासनाकडे पाठविण्यात आला असून, शेतकऱ्यांचे डोळे या निर्णयाकडे लागले आहेत.

अवकाळी स्वरूपात अचानक होणाऱ्या पावसामुळे या वर्षी जिल्ह्यातील शेतीचे मोठे नुकसान झाले आहे. सर्वाधिक फटका सातारा, फलटण, जावळी, कोरेगाव, वाई, पाटण व महाबळेश्वर तालुक्यांना बसला आहे. त्यानंतर शासनाने या नुकसानीचे पंचनामे करण्यात आले,

त्याची भरपाईची रक्कम मिळण्याआधीच सप्टेंबरमध्ये सहा तालुक्यात ढगफुटीसदृश पाऊस झाला. यामध्ये खरिपातील अंतिम टप्प्यात असलेल्या पिकांचे नुकसान झाले. कोरेगाव तालुक्यात राजम्याचे मोठे नुकसान झाले.

तर इतर ठिकाणी घेवडा व कडधान्याचे नुकसान झाले आहे. या ढगफुटीचा सहा तालुक्यांतील आठ हजार ७३५ शेतकऱ्यांना बसला आहे. एकूण २०४२ हेक्टरवरील खरीप पिकांचे नुकसान झाले आहे. तर बागायती पिकांचे ८९८.१४ हेक्टर, तर फळ पिकांचे २.६ हेक्टरवर नुकसान झाले आहे. यातून जिल्ह्याचे पाच कोटी २२ लाख ६८ हजार रुपयांचे नुकसान झाले आहे.

नुकसानीची स्थिती (हेक्टरमध्ये) कंसात शेतकरी संख्या

जिरायती पिके २०४२ (६ हजार १८१)

बागायती पिके ८९८.१४ (२ हजार ५७६)

फळपिके २.६ (आठ)