Solapur News : वैष्णवांचा मेळा सकळ मिळाला ।

विठ्ठलनामकाला पंढरीसी ॥ १ ॥

हरिनामा विनट हरी उच्चारीत ।

सप्रेम डुल्लत भक्तजन ॥ २ ॥

या उक्तीप्रमाणे श्री संत ज्ञानेश्वर महाराज, जगद्गुरू, श्री संत तुकाराम महाराज, श्री संत सोपानदेव महाराज, संत चांगावटेश्वर महाराज यांचे पालखी सोहळे सोमवारी (ता. २६) दुपारच्या विसाव्याच्या निमित्ताने तोंडले-बोंडले (ता.माळशिरस) येथे एकत्र आले. या निमित्ताने लाखों वैष्णवांचा मेळा फुलून गेला. टाळ-मृदंगाचा गजर आणि हरिनामाने परिसर भक्तिरसात भारून गेला.

आषाढी एकादशी वारीच्या निमित्ताने पंढरीच्या विठुरायाला भेटण्याची आस धरून निघालेले श्री संत ज्ञानेश्वर महाराज, श्री जगद्गुरू संत तुकाराम महाराज यांचे पालखी सोहळे वेळापूर व बोरगाव येथील मुक्काम आटोपून दुपारच्या विसाव्यासाठी तोंडले-बोंडलेत दाखल झाले.

तर श्री संत सोपानदेव महाराज व श्री संत चांगावटेश्वर महाराज यांचे पालखी सोहळे कालच रात्रीच्या मुक्कामासाठी बोंडले येथे विसावले होते. प्रमुख पालख्यांचे पालखी सोहळे येथे एकत्र आल्याने लाखों वैष्णवांचा मेळा याठिकाणी जमला होता.

आजूबाजूने एक-एक सोहळे गावात दाखल होत असताना, हरिनामाच्या गजराने संपूर्ण परिसर दुमदुमून गेला. फटाक्यांची आतषबाजी, संतांच्या पादुकांना नंदाच्या ओढ्यावर स्नान घालून गावकऱ्यांच्या वतीने मोठ्या उत्साहात पालखी सोहळ्यांचे स्वागत करण्यात आले.

दुपारचे जेवण व विसाव्यानंतर संत ज्ञानेश्वर महाराज व श्री संत सोपानदेव महाराज भंडीशेगाव तर श्री संत तुकाराम महाराज यांचा पालखी सोहळा पिराची कुरोली येथे पुढील मुक्कामासाठी मार्गस्थ झाला.

दुपारचे जेवण व विसाव्यानंतर संत ज्ञानेश्वर महाराज व श्री संत सोपानदेव महाराज भंडीशेगाव तर श्री संत तुकाराम महाराज यांचा पालखी सोहळा पिराची कुरोली येथे पुढील मुक्कामासाठी मार्गस्थ झाला.