Ashadhi Wari 2023 : शासकीय महापूजा कालावधीत मुखदर्शन सुरू ठेवावे

Solpaur News : आषाढी वारी सोहळ्यासाठी वारकरी भाविकांची होणारी गर्दी लक्षात घेता येणाऱ्या भाविकांना श्री विठ्ठल-रुक्मिणीचे दर्शन सुलभ व जलद व्हावे, यासाठी आषाढी एकादशीच्या शासकीय महापूजा कालावधीत श्रींचे मुखदर्शन सुरू ठेवावे, अशा सूचना पालकमंत्री राधाकृष्ण विखे पाटील यांनी शुक्रवारी (ता. २३) दिल्या.

आषाढी वारी कालावधीत भाविकांना देण्यात येणाऱ्या सुविधाबातचा आढावा पालकमंत्री विखे पाटील यांनी घेतला. भक्त निवास येथे झालेल्या बैठकीस खासदार रणजितसिंह नाईक निंबाळकर, आमदार समाधान आवताडे, आमदार सचिन कल्याणशेट्टी, माजी मंत्री लक्ष्मण ढोबळे, जिल्हाधिकारी मिलिंद शंभरकर, मुख्य कार्यकारी अधिकारी दिलीप स्वामी, जिल्हा पोलिस अधिक्षक शिरीष सरदेशपांडे, नगरविकास विभागाचे उपसचिव अनिरुद्ध जेवळीकर, अप्पर जिल्हाधिकारी तुषार ठोंबरे, अतिरिक्त मुख्य कार्यकारी अधिकारी संदीप कोहिनकर, प्रांताधिकारी गजानन गुरव, मंदिर समितीचे कार्यकारी अधिकारी राजेंद्र शेळके उपस्थित होते.

पालकमंत्री विखे-पाटील म्हणाले, की आषाढी एकादशीच्या शासकीय महापूजा कालावधीत मुखदर्शन घेणारा भाविक वारकरी मुख दर्शन रांगेत खोळंबून राहतो. महापूजा कालावधीत मुखदर्शन सुरू राहिल्यास वारकरी भाविकांना त्याचा लाभ होईल. मुखदर्शन सुरू ठेवण्याबाबत आवश्यक उपाय योजना मंदिर समितीने करावी.

यासाठी मंदिर समितीने व्हीव्हीआयपी यांना बसण्याचे ठिकाण, मानाच्या वारकऱ्यांचा सत्कार याबाबत आवश्यक ते नियोजन करावे. शासकीय महापूजा झाल्यानंतर व्हीआयपी दर्शन होणार नाही. मात्र पारंपारिक दिंड्यांचे प्रथा परंपरेप्रमाणे दर्शन सुरू राहील याची दक्षता मंदिर समितीने घेऊन आवश्यकती कार्यवाही करावी, असेही ते म्हणाले.

महिलांसाठी आवश्यक सुविधा द्या

वारी कालावधीत महिलांसाठी आवश्यक सुविधा उपलब्ध करून देण्यास प्राधान्य द्यावे. चंद्रभागा वाळवंट व आवश्यक ठिकाणी चेंजिंग रूम तयार कराव्यात. वारीत उभारण्यात आलेल्या शौचालयांमध्ये नियमित व पुरेसा पाणी साठा उपलब्ध करून द्यावा. शौचालयांसाठी टँकरने पाणी पुरवठा करण्यापेक्षा अन्य काही उपाय योजना करण्याबाबत नगरपालिका व प्रशासनाने कार्यवाही करावी, अशा सूचना पालकमंत्र्यांनी बैठकीत दिल्या.