कोल्हापूर ः जिल्हा मध्यवर्ती सहकारी बॅंकेकडून (Kolhapur District Bank) तब्बल २ हजार १४४ कोटी ३६ लाख रुपये पीककर्ज (Crop Loan) वाटप करण्यात आले आहे. या तुलनेते राष्ट्रीयीकृत व इतर बॅंकांकडून ६७८ कोटी ८० लाख रुपये वाटप झाले आहेत. यात जिल्हा बॅंकेने पीककर्ज वाटपाचे (Crop loan Distribution) १२३ टक्के उद्दिष्ट पूर्ण केले आहे. तर, राष्ट्रीयीकृत बँकांकडून (Nationalize Bank Crop Loan) ७० टक्के वाटप पूर्ण झाले आहे. शेतकऱ्यांच्या सेवेसाठी जिल्हा बॅंक नेहमीच तत्पर आहे. गावपातळीवरील सहकारी सेवा संस्थांच्या माध्यमातून थेट शेतकऱ्यांना पीककर्ज वाटप केले जाते.

शेतकऱ्यांना वेळेत कर्ज मिळावे यासाठी जुजबी पण आवश्‍यक कागदपत्रे घेऊन तत्काळ त्यांना एकरी मंजूर असणारे कर्ज दिले जाते. जिल्ह्यात सुमारे पन्नासहून राष्ट्रीयीकृत आणि नागरी सहकारी बॅंका कार्यरत आहेत. यापैकी, पीककर्ज वाटपाचा सर्वाधिक वाटा एकट्या जिल्हा बॅंकेकडून उचलला जातो. जिल्ह्यातील सुमारे दोन लाखांहून अधिक खातेदार शेतकऱ्यांना पीककर्ज वाटप केले जात आहे. प्रत्येक वर्षी जिल्हा बॅंकेकडे कर्जवाटपाची टक्केवारी वाढवली जात आहे. या तुलनेत राष्ट्रीयीकृत बॅंकांनीही कर्जवाटपाची धुरा सांभाळावी, अशी मागणी शेतकऱ्यांमधून होत आहे.

जिल्हा बॅंकेकडून ज्या शेतकऱ्यांने पूर्वीचे पीककर्जाची परतफेड केली आहे. त्या शेतकऱ्याला मागणीवरून तत्काळ कर्ज उपलब्ध करून देत आहे. दरम्यान, तीन लाखांपर्यंत व्याज आकारणी केली जात नाही. त्यामुळे शेतकऱ्यांना याचा फायदा होत आहे.

कर्जवाटपाचे जिल्हा बॅंक व इतर बॅंकांचे उद्दिष्ट

बॅंक* २०२१-२२ मधील उद्दिष्ट* पीककर्ज वाटप* उद्दिष्ट टक्केवारी

जिल्हा बॅंक* १७५० कोटी* २१४४ कोटी ३६ लाख* १२३ टक्के

राष्ट्रीयीकृत व इतर बॅंक* ९७० कोटी* ६७८ कोटी ८० लाख* ७० टक्के