Nagar News : जिल्ह्यात पाऊस नसला तरी अकोले तालुक्यातील पश्चिम भागातील रतनवाडी, घाटघर परिसरांत जोरदार पाऊस सुरू आहे. भंडारदरा धरणात पाण्याची होणारी आवक पाहता ८३ टक्क्यांवर पाणीसाठा ठेवून सोमवारी (ता. २४) सकाळी भंडारदरा धरणातून ३ हजार १९७ क्युसेकने पाण्याचा प्रवरा नदीत विसर्ग सुरू केला आहे. दुपारी बारा वाजता हा विसर्ग ४ हजार २९७ क्युसेकने करण्यात आला. यामुळे आता निळवंडे धरणही लवकर भरणार आहे.

नगर जिल्ह्यात अजूनही बहुतांश भागात जोरदार पाऊस नाही. त्यामुळे शेतकरी चिंतेत असताना अकोले तालुक्याच्या पश्चिम भागात, भंडारदरा, निळवंडे, मुळा धरणांसह नगरला पाणी देणाऱ्या पुणे जिल्ह्यातील धरणात पाणी साठवण होत असल्याने लाभक्षेत्रात काहीसे समाधान आहे.

अकोले तालुक्यातील रतनवाडी, घाटघर, हरिश्‍चंद्रगड परिसरात जोरदार पाऊस सुरू आहे. प्रशासनाकडील नोंदीनुसार सोमवारी (ता. २४) सकाळी सहा वाजेपर्यंतच्या चोवीस तासांत घाटघरला १४६ मिलीमीटर, रतनवाडीला १४१ मिलीमीटर, पांजरे येथे १०४ मिलीमीटर, वाकीला ५७ मिलीमीटर भंडारदरा धरण परिसरात ७५ मिलीमीटर पावसाची नोंद झाली आहे.

भंडारदरा धरणात होत असलेल्या पाण्याच्या आवकेचा विचार करता धरणात सव्वानऊ टीएमसी (८३ टक्के) पाणीसाठा झाल्यावर धरणातून सकाळी दहा वाजता ३ हजार १९७ क्युसेकने पाण्याचा प्रवरा नदीत विसर्ग सुरू केला आहे. दुपारी बारा वाजता हा विसर्ग ४ हजार २९७ क्युसेकने करण्यात आला.

हे पाणी प्रवरेतून निळवंडे धरणात येणार आहे. ८.३ टीएमसी क्षमतेच्या मुळा धरणात सध्या ४०.३८ टक्के पाणीसाठा असला तरी आता भंडारदरातून विसर्ग सुरू केल्याने ते पाणी निळवंडेत येणार आहे. त्यामुळे निळवंडे धरणही लवकर भरणार आहे.

पाणलोटातील पावसामुळे मुळा धरणातही सोमवारी (ता. २४) सकाळी कोतुळजवळ ६ हजार ५९२ क्युसेकने आवक सुरू होती. मुळात आतापर्यंत ५०.४३ टक्के म्हणजे १३ टीएमसीपेक्षा अधिक पाणीसाठा झाला आहे.