Nashik News : राज्यात पिकाची उत्पादकता वाढविण्यासाठी शेतकऱ्यांकडून विविध भागांत विविध प्रयोग करण्यात येतात. अशा प्रयोगशील शेतकऱ्यांना मिळालेल्या उत्पादकतेबाबत प्रोत्साहन देऊन गौरव केल्यास त्यांची इच्छाशक्ती, मनोबल यामध्ये वाढ होणे, नवनवीन अद्ययावत तंत्रज्ञानाचा वापर करून कृषी उत्पादनांमध्ये वाढ होऊन इतर शेतकऱ्यांना त्यांचे मार्गदर्शन मिळावे या दृष्टिकोनातून पीक स्पर्धांचे आयोजन केले जाते.

कृषी विभागामार्फत राज्यांतर्गत खरीप पीक स्पर्धा २०२३ चे आयोजन करण्यात आले आहे. जास्तीत जास्त शेतकऱ्यांनी आपला सहभाग नोंदवावा, असे आवाहन विभागीय कृषी सहसंचालक मोहन वाघ यांनी केले.

नाशिक, धुळे, नंदूरबार व जळगाव जिल्ह्यांमध्ये खरीप हंगामामध्ये भात, ज्वारी, बाजरी, मका, नाचणी (रागी), तूर, मूग, उडीद, सोयाबीन, भुईमूग व सूर्यफूल या पिकांचा अंतर्भाव पीक स्पर्धेत केला आहे. स्पर्धेत सहभागासाठी मूग व उडीद या पिकांसाठी अंतिम दिनांक ३१ जुलै असून भात, ज्वारी, बाजरी, मका, नाचणी (रागी), तूर, सोयाबीन, भुईमूग व सूर्यफूल या पिकांसाठी अंतिम ३१ ऑगस्ट आहे.

स्पर्धेत सहभागी होण्यासाठी शेतकऱ्यांना स्वत:च्या नावावर असलेला ७-१२, व ८ अ आवश्यक असून, आदिवासी शेतकरी बांधवांसाठी जातीचा दाखला असणे आवश्यक आहे. पीकनिहाय चलन फी ३०० रुपये आहे. पीक स्पर्धा योजनेत सहभागी होण्यासाठी तालुका कृषी अधिकाऱ्यांशी संपर्क साधावा, असेही विभागीय कृषी सहसंचालक मोहन वाघ यांनी कळविले.

पीक स्पर्धेत निवड झालेल्या लाभार्थ्यांना बक्षिसाची रक्कम (हजार रुपये)

स्तर प्रथम द्वितीय तृतीय

तालुका ५ ३ २

जिल्हा १० ७ ५

राज्य ५० ४० ३०