औरंगाबाद : औरंगाबाद जिल्ह्यातील विविध शेतीपद्धतीचा अभ्यास (Agriculture Study) व शेतीज्ञान, विज्ञान व तंत्रज्ञानातील प्रगती पाहिल्यानंतर केनियातील ल्युकेनिया विद्यापीठाच्या (Lukenya University) शिष्टमंडळाने डॉ. भगवानराव कापसे यांच्या नेतृत्वातील शिष्टमंडळाशी संवाद साधला.

औरंगाबाद येथील जनजागृती प्रतिष्ठानच्या माध्यमातून शेतीज्ञान जाणून घेण्यासाठी केनिया येथील ल्युकेनिया विद्यापीठाचे शिष्टमंडळ ५ व ६ डिसेंबरला मराठवाड्यात आले होते. या शिष्टमंडळात ल्युकेनिया विद्यापीठाचे कौन्सिल मेंबर सचिन शहा यांच्यासह कसांगा डेव्हिड दंबुकी, मुवेला सामी मुटावी यांचा समावेश होता.

औरंगाबाद व जालना जिल्ह्यांतील रेशीम उद्योग, कपाशी, मका इतर पीकपद्धतीच माहिती जाणून घेणाऱ्या ल्युकेनिया विद्यापीठाच्या शिष्टमंडळाने पुढील काळात एकत्रितपणे काम करण्याच्या संधीवर डॉ. भगवानराव कापसे यांच्या नेतृत्वातील सहकाऱ्यांशी औरंगाबाद येथे संवाद साधला.

या संवादात रेशीम विभागाचे उपसंचालक दिलीप हाके, जवळपास १२ वर्षे केनियातील विविध भागांत शेती उद्योगाशी जोडून असलेले अशोक लडकत, डॉ. माने, डॉ. बैनाडे, विलास कापसे आदींनी सहभाग नोंदविला.

या संवादात श्रीा. शहा, डॉ. माने, डॉ. बैनाडे, श्री. लडकत, श्री. हाके यांनीही आपली मते मांडली. डॉ. कापसे व केनियन शिष्‌टमंडळाच्या प्रतिनिधींनी हे काम अवघड असले, तरी केनियातील शेतकऱ्यांचा आर्थिक स्तर सुधारण्यासाठी ते हाती घेणे आवश्‍यक असल्याचे सांगितले. ल्युकेनिया विद्यापीठाच्या प्रमुखांसह इतर सहकाऱ्यांशी सविस्तर संवाद केल्यानंतर पुढील कार्याची दिशा ठरविली जाणार आहे.