Tomato Rate India : देशभरात टोमॅटोचे दर अचानक तेजीत आल्याचे पाहायला मिळत आहे. गेल्या महिन्यात अवघ्या तीन ते पाच रुपये किलोने शेतकऱ्यांना टोमॅटो विकाला लागला होता.

मात्र, सध्या किरकोळ बाजारात टोमॅटोचे दर ८० ते १०० रुपये प्रतिकिलोवर पोहोचल्याचे चित्र आहे. किरकोळ बाजारातील दर वाढल्याने परिणामी शेतकऱ्यांनाही चांगला दर मिळत आहे. देशभरातील बाजारात टोमॅटोच्या दराची हीच स्थिती दिसत आहे.

टोमॅटोच्या वाढलेल्या दरांमुळे गृहिणींचे बजेट कोलमडले आहे. अशातच तामिनाडूतील नागरिकांना टोमॅटोच्या दरात काही अंशी दिलासा मिळणार आहे. एकीकडे देशभरातील किरकोळ बाजारात टोमॅटोचे दर १०० रुपयांवर गेलेल असताना तामिळनाडूतील नागरिकांना मात्र ६८ रुपये प्रतिकिलोने टोमॅटो खरेदी करता येणार आहे.

तामिळनाडूतील नागरिकांना टोमॅटोच्या वाढत्या दरांपासून दिलासा देण्यासाठी थेट फार्म फ्रेश आउटलेट्सवर (एफएफओ) टोमॅटोची विक्री केली जाणार आहे. या एफएफओवर ६८ रुपये प्रतिकिलो या दराने टोमॅटोची विक्री केली जाणार आहे.

याशिवाय हे दर आणखी कमी करून ते ६० रुपयांवर आणण्यासाठीही महत्त्वपूर्ण पावले उचलली जात आहेत, अशी माहिती तामिळनाडूचे सहकार आणि अन्न व ग्राहक संरक्षण मंत्री पेरियाकुरप्पन यांनी दिली आहे.

टोमॅटोचे दर वाढीची कारणे

मे महिन्यामध्ये उष्ण वातावरणामुळे प्रमुख उत्पादक राज्यांत टोमॅटो पिकाला मोठ्या प्रमाणात फटका बसला. त्यातच बिपरजॉय चक्रिवादळामुळे राजस्थान आणि गुजरात या राज्यांसह इतर राज्यातही टोमॅटो पिकाचे नुकसान झाले. परिणामी बाजारातील टोमॅटोची आवक घटल्याने मागील आठवड्यापासून टोमॅटोच्या दरात तेजी आल्याचे चित्र आहे.

दरम्यान, देशातील अनेक भागांमध्ये पावसामुळे टोमॅटो पिकाचे मोठे नुकसान झाले आहे. मुसळधार पावसामुळे शेतातच पीक खराब होत असल्याने बाजारात कमी प्रमाणात मालाची आवक होत आहे. ज्यामुळे बाजारात टोमॅटोच्या दरात तेजी आली आहे.