लुधियाना (वृत्तसंस्था) ः काँग्रेस नेते राहुल गांधी (rahul Gandhi) यांनी ‘भारत जोडो’ यात्रेदरम्यान (Bharat Jodo Yatra) आज केंद्रावर पुन्हा हल्ला चढविला. पुरेसे सहकार्य केल्यास पंजाबमधील लुधियानातील लघु व मध्यम उद्योग (MSME Industry) चीनशी स्पर्धा करू शकतात. मात्र, पंजाब सरकार आणि केंद्र सरकार येथील उद्योगांना सहकार्य करत नसल्याचा आरोप त्यांनी केला. ते सभेला संबोधित करताना बोलत होते. भारत जोडो यात्रा सध्या पंजाबमध्ये आहे. लुधियाना पंजाबची औद्योगिक राजधानी म्हणून ओळखली जाते.

भाजपवर प्रहार करण्याचा प्रयत्न केल्यामुळे देशात द्वेष, हिंसा व भीतीचे वातावरण पसरविले जात असल्याचा आरोपही राहुल गांधींनी पुन्हा केला. ते म्हणाले, की देशात द्वेष आणि हिंसाचाराला कसलेही स्थान असता कामा नये. हा बंधुत्व, प्रेम आणि आदर दिला जाणारा देश आहे. नोटाबंदीवरूनही त्यांनी केंद्र सरकारवर पुन्हा निशाणा साधला.

ते यासंदर्भात म्हणाले, की पंतप्रधान मोदी यांनी नोटाबंदी आणि जीएसटीची चुकीच्या पद्धतीने अंमलबजावणी केल्याने लुधियानासह देशातील लघु व मध्यम उद्योगांवर विपरीत परिणाम झाला. नोटाबंदी आणि चुकीचा जीएसटी ही धोरणेच नाहीत तर लघु व मध्यम उद्योग संपविण्याची ती शस्त्रे आहेत, हे सत्य आहे.

देशातील अब्जपती रोजगार देऊ शकत नाहीत, मात्र लुधियानातील लघु व मध्यम उद्योग देशाला रोजगार देऊ शकतात. त्यामुळे, या उद्योगांना सहकार्य करून त्यांना बळ दिल्यास लुधियाना चीनशी स्पर्धा करू शकते. मात्र, पंजाब सरकारसह केंद्र सरकारकडे कसलीही दूरदृष्टी नसल्याने येथील उद्योगांना यांच्यापैकी कुणीही सहकार्य करत नाही, अशी खंतही त्यांनी व्यक्त केली.

यात्रेला दोरहामधून पुन्हा सुरुवात

‘भारत जोडो’ यात्रा गुरुवारी पंजाबमधील दोरहामधून पुन्हा सुरू झाली. यावेळी स्थानिक मोठ्या संख्येने यात्रेत सहभागी झाले. त्याचप्रमाणे, काँग्रेसचे अनेक कार्यकर्ते राष्ट्रध्वज घेऊन यात्रेत चालत होते.

फतेगड साहिबमधील सिरहिंदपासून ‘भारत जोडो’चा पंजाबमधील टप्पा बुधवारी(ता.११) सुरू झाला होता. नियोजनानुसार यात्रा पंजाबमध्ये लुधियाना, गोरया, जालंधर, दासूयामार्गे जाणार आहे. काँग्रेसचे पंजाब प्रदेशाध्यक्ष अमरिंदरसिंग राजा वॉरिंग, माजी मुख्यमंत्री चरणजितसिंग चन्नी आदीही यात्रेत सहभागी झाले आहेत.