कोल्हापूर : कणेरी (ता. करवीर) येथील श्री. सिद्धगिरी कृषी विज्ञान केंद्र (KVK) यांच्यामार्फत राष्ट्रीय अन्नसुरक्षा अभियान २०२२-२३ अंतर्गत समूह आद्यरेखा पीक प्रात्यक्षिक-गळीत धान्यअंतर्गत सोयाबीन पिकाचे (Soybean Crop) प्रात्यक्षिके कणेरी, कोगील बुद्रुक, द. वडगाव व व्हन्नूर या गावांमध्ये एकूण १२५ एकरावर राबविण्यात आले.

सोयाबीनच्या विविध वाणांचे प्रदर्शन व पीक स्पर्धेचे आयोजन दर्याचे वडगाव (ता. करवीर) येथे नुकतेच झाले. जिल्हा अधीक्षक कृषी अधिकारी जालिंदर पांगरे, कृषी विज्ञान केंद्राचे वरिष्ठ शास्त्रज्ञ व प्रमुख डॉ. रवींद्र सिंह, द. वडगावचे सरपंच अनिल मुळीक आदींची प्रमुख उपस्थिती होती.

राष्ट्रीय अन्न सुरक्षा अभियान अंतर्गत राबविण्यात आलेल्या प्रात्यक्षिकांची सविस्तर माहिती ‘केव्हीके’चे पांडुरंग काळे यांनी दिली. कार्यक्रमादरम्यान माऊली ड्रोन सर्व्हिसेसद्वारे ड्रोन तंत्रज्ञानाचे प्रात्यक्षिक दाखविण्यात आले.

कार्यक्रमादरम्यान आयोजित सोयाबीन पीक स्पर्धेमध्ये कणेरी, कोगील बुद्रुक, द. वडगाव व व्हन्नूर या गावांतील शेतकऱ्यांनी सहभाग घेतला. उपस्थित मान्यवरांद्वारे शेतकऱ्यांच्या सोयाबीनची पाहणी करून यामध्ये फुले संगम, फुले किमया व कमी कालावधीच्या सोयाबीनचे गट करून त्यामधून शेतकऱ्यांना गौरविण्यात आले.

फुले संगममध्ये महावीर किणीकर, नागनाथ बेणले, महादेव बामणकर, फुले किमया वाणात प्रथम आदिनाथ किणीकर, मधुकर बोडके, पांडूरंग जोशिलकर, इतर वाणात शिवाजी जाधव, द्वितीय संभाजी पाटील, राजेंद्र निकम. आदी शेतकऱ्यांनी बक्षीस मिळवले. राजेंद्र वावरे यांनी सूत्रसंचालन केले. सुनील कुमार यांनी आभार मानले.