अकोला ः ‘‘आज बाजारात जे विकते ते पिकवावे. सोबतच घरच्या घरी निविष्ठा तयार करून उत्पादन खर्चात कशा पद्धतीने बचत होऊ शकते, या तंत्राची माहिती शेतकरी उत्पादक (Farmers Producers Company) कंपनीने अधिकाधिक शेतकऱ्यांपर्यंत पोहोचवावी,’’ अशा सूचना राज्याच्या कृषी आयुक्तालयातील निविष्ठा व गुणनियंत्रण संचालक दिलीप झेंडे यांनी व्यक्त केली. जानेफळ येथे विदर्भ समृद्धी कृषी उत्पादक शेतकरी कंपनीला त्यांनी भेट देऊन आढावा घेतला. या वेळी ते बोलत होते.

सीताफळ महासंघाचे अध्यक्ष श्याम गट्टाणी, जिल्हा अधीक्षक कृषी अधिकारी एस. एन. डाबरे, मेहकर उपविभागीय कृषी अधिकारी ए. के. मिसाळ, तालुका कृषी अधिकारी के. एस. काळे, लोणार तालुका कृषी अधिकारी व्ही. पी. सरोदे, तुळजाई शेतकरी कंपनीचे अध्यक्ष डॉ. केशवराव अवचार,

विदर्भ समृद्धी कृषी उत्पादक कंपनीचे अध्यक्ष संतोष साखरे, उपाध्यक्ष मोहन धोटे, सचिव अमोल माडोकर, संचालक मोहन जी. धोटे यांच्यासह मंडळ कृषी अधिकारी पी. एन. गाडेकर, कृषी पर्यवेक्षक डी. जी. वायाळ, कृषी सहायक डी. ए. जाधव, पी. एस. अंभोरे, आर. डी. झोरे, पी. एस. देवकर, जी. ए. चव्हाण, डी. एल. देशमुख आदी उपस्थित होते.

या वेळी श्री. झेंडे यांनी कंपनीच्या कामकाजाचा आढावा घेतला. या भागात रब्बीत गहू, हरभरा या पिकांसोबतच मोहरी, जवस व इतर पिकांचे क्षेत्र वाढीसोबत प्रयत्न करण्याबाबत सुचवले. या पिकांना बाजारात मागणी असून शेतकऱ्यांनाही पर्याय मिळेल, असेही त्यांनी सांगितले.