Nagpur News : देशात केळीची टंचाई निर्माण झाली आहे. आवक कमी झालेली आहे. त्यामुळे गणेशोत्सवात केळीच्या दरात वाढ झालेली आहे. सण आणि नवरात्रोत्सवाच्या पार्श्‍वभूमीवर दर आणखी वाढण्याची शक्यता आहे. गेल्या पाच दिवसांत केळीच्या दरात प्रतिडझन (१२ केळ) १० ते १५ रुपयांची वाढ झालेली आहे.

जळगाव, गुजरात, उत्तर प्रदेश आणि मध्य प्रदेशातून केळीची आवक घटली आहे. आंध्र प्रदेशातही केळी काढणीवर आलेली नाही. तेथे ऑक्टोबरमध्ये पिलबागांमधील (खोडवा) काढणी सुरू होईल.

तर नोव्हेंबरमध्ये नियमित हंगामातील केळीची आवक सुरू होईल. तमिळनाडूमध्ये आवक होत आहे. परंतु तेथेही मागणी वाढलेली आहे. त्यामुळे स्थानिक बाजारात किंवा देशांतर्गत बाजारात केळीला ३३०० ते ४४०० रुपये प्रतिक्विंटलचा दर आहे.

जळगाव जिल्ह्यात मागील वर्षी सप्टेंबर, ऑक्टोबरमध्ये केळीची लागवड कमी होती. देशात सण-उत्सवाचे वातावरण आहे. यामुळे मागणी कायम आहे. पुढे आवक कमी होईल व मागणी अधिकची राहण्याची शक्यता आहे. गणेशोत्सव, नवरात्रोत्सवाचा कालावधी आहे. यामुळे दरात आणखी वाढ होईल, असे संकेत आहेत.