अकोला : ‘‘अकोला रेल्वे स्थानक (Akola Railway) हे दक्षिण व उत्तरेकडील राज्यांना जोडणारे महत्त्वाचे स्थानक आहे. अकोला-अकोट पॅसेंजर रेल्वे सेवेमुळे उत्तरेकडील राज्ये अकोल्याशी जोडण्याच्या दिशेने महत्त्वाचे पाऊल असून येत्या काळात देशात हा जिल्हा दळणवळणाचे महत्त्वाचे केंद्र ठरेल,’’ असा विश्वास उपमुख्यमंत्री तथा अकोला जिल्ह्याचे पालकमंत्री देवेंद्र फडणवीस (Devendra Fadanvis) यांनी व्यक्त केला.

अकोला-अकोट पॅसेंजर (गाडी क्र.०७७१८)चा प्रारंभ सोहळा बुधवारी (ता.२३) येथील दक्षिण मध्य रेल्वेच्या अकोला रेल्वे स्थानकावर झाला. यावेळी ऑनलाइन पद्धतीने श्री. फडणवीस, रेल्वे राज्यमंत्री रावसाहेब दानवे सहभागी होते. समारंभप्रसंगी जिल्हा परिषद अध्यक्ष संगीता अढाऊ, आमदार डॉ. रणजित पाटील, आमदार वसंत खंडेलवाल, आमदार प्रकाश भारसाकळे, आमदार हरीश पिंपळे आणि आमदार रणधीर सावरकर, रेल्वेच्या नांदेड विभागीय व्यवस्थापक उपेंद्र सिंह आणि अकोला रेल्वे स्थानकाचे व्यवस्थापक शंकर शिंदे उपस्थित होते.

श्री. फडणवीस म्हणाले, ‘‘अकोला-खांडवा’ या रेल्वे मार्गाच्या गेज परिवर्तनाच्या कामातील महत्त्वाचा टप्पा म्हणून ‘अकोला-अकोट’ हा ४४ किलोमीटरचा रेल्वे मार्ग महत्त्वाचा आहे. ब्रॉड गेजच्या पुढच्या टप्प्यात ‘अकोट ते खांडवा’ (मध्यप्रदेश) रेल्वे मार्गाचे काम पूर्ण होणार आहे.

हा रेल्वे मार्ग पुढे मेळघाट व्याघ्र प्रकल्पातून जात असल्याने या भागातील वन्यजीवांना त्रास होणार नाही याची काळजी घेण्यात येत आहे. या रेल्वे मार्गामुळे अकोला, बुऱ्हाणपूर आणि खांडवा शहरांना जोडण्यात येणार आहे.’’