Karad News : अजित पवार यांना मुख्यमंत्रिपदाची ऑफर आहे. मुख्यमंत्री एकनाथ शिंदे यांना बाजूला करतील आणि पुढे अजित पवार यांना मुख्यमंत्री करतील, अशी माझी माहिती आहे, अशी टिप्पणी माजी मुख्यमंत्री आमदार पृथ्वीराज चव्हाण यांनी सोमवारी (ता. ३) केली.

ज्येष्ठ नेते यशवंतराव चव्हाण यांच्या समाधीस्थळी राष्ट्रवादी काँग्रेसचे अध्यक्ष शरद पवार हे अभिवादन करण्यासाठी आले होते. त्या वेळी आमदार चव्हाण हे प्रीतीसंगमावर दाखल झाले होते. त्यादरम्यान त्यांनी पत्रकारांशी संवाद साधला. ते म्हणाले, की जनतेला गद्दारी अजिबात आवडत नाही.

जे भाजपसोबत गेले आहेत. त्यांनी राजीनामे देऊन निवडणुकीला सामोरे जावे. त्यांना योग्य जागा कळेल. मोदी व भाजपविरोधात महाविकास आघाडी कायम राहणार आहे. जे सोबत आहेत त्यांच्यासोबत ताकदीने आम्ही भाजपविरोधात लढा देणार आहोत.

शिवसेना फुटली त्यातील पक्षांतर बंदीचा निकाल ऑगस्टमध्ये आहे. त्यात निकाल सूर्यप्रकाशाइतका स्वच्छ आहे. सरकार कोसळू नये यासाठीची भाजपकडून हा प्रयत्न सुरू आहे.

त्यातूनच अजित पवार यांना मुख्यमंत्रिपदाची ऑफर आहे. मुख्यमंत्री एकनाथ शिंदे यांना बाजूला करतील आणि पुढे अजित पवार यांना मुख्यमंत्री करतील, अशी माझी माहिती आहे, असेही त्यांनी सांगितले.