Agrowon Podcast : कांदा दरात काहिशी सुधारणा; कापूस, सोयाबीन, कांदा, तसेच काय आहे हरभरा दर?

Market Bulletin :

सोयाबीन स्थिर

आंतरराष्ट्रीय बाजारात सोयाबीनच्या दरात चढ उतार सुरुच आहेत. पण देशात मात्र सोयाबीनचा भाव स्थिरावलेला दिसत आहे. आंतरराष्ट्रीय बाजारात आज दुपारपर्यंत सोयाबीनचे वायदे काहीसे वाढले होते. सोयाबीनचे वायदे ९.९२ डाॅलर प्रतिबुशेल्सवर होते. देशातील बाजारात प्रक्रिया प्लांट्सनी आपले खरेदीचे भाव आज ४ हजार ५५० ते ४ हजार ७०० रुपयांच्या दरम्यान काढले होते. तर बाजार समित्यांमधील व्यवहार ४ हजार ते ४ हजार ५०० रुपयांनी झाले. सोयाबीनच्या भावातील चढ उतार कायम राहतील, असा अंदाज अभ्यासकांनी दिला.

कापसात नरमाई

कापसाच्या भावातील चढ उतार सुरुच आहेत. चांगल्या उत्पादनाचे अंदाज, कमी झालेली मागणी आणि कच्च्या तेलाच्या किमतीतील घट याचा परिणाम कापसाच्या भावावर दिसून येत असल्याचे अभ्यासकांनी सांगितले. यामुळे कापसाचा सुधालेला भाव पुन्हा कमी झाला. देशातील बाजारात आजही कापसाचे भाव काहीसे कमी झाले. कापसाचा सरासरी भाव आज ६ हजार ७०० ते ७ हजार ६०० रुपयांच्या दरम्यान होते. तर आंतरराष्ट्रीय बाजारातील कापसाचे वायदे ७१ सेंट प्रतिपाऊंडच्या दरम्यान होते. कापसाच्या भावातही चढ उतार कायम राहू शकतात, असा अंदाज कापूस बाजारातील अभ्यासकांनी व्यक्त केला.

कांद्यात काहिशी सुधारणा

कांद्याच्या भावातील चढ उतार कायम आहेत. वाढेल्या भावात कांद्याला उठाव कमी होत आहे. मात्र भाव जास्त कमी झाल्यानंतर बाजारातील आवक कमी होत आहे. पण दुसरीकडे सरकारचा दबावही कांदा बाजारावर कायम आहे. त्यामुळे परिस्थिती असतानाही कांदा दरात मोठी तेजी आली नाही. आज कांद्याचा भाव महत्वाच्या बाजारांमध्ये काहिसा वाढून सरासरी ४ हजार २०० ते ४ हजार ७०० रुपयांच्या दरम्यान होते. कांदा भावात आणखी काही दिवस चढ उतार राहू शकतात, असा अंदाज कांदा बाजारातील अभ्यासकांनी व्यक्त केला.

हरभरा भाव नरमले

हरभऱ्याच्या भावातही काहिशी नरमाई आली आहे. देशातील अनेक बाजारात हरभऱ्याचा भाव वाढला होता. सणांमुळे हरभऱ्याची मागणी मोठ्या प्रमाणात वाढली. पण सरकारच्या दबावामुळे आणि स्वस्त वाटाण्यामुळे हरभरा भावावर काहिसा दबाव आला आहे. बाजार समित्यांमध्ये हरभऱ्याला सध्या ६ हजार ५०० ते ७ हजार २०० रुपयांच्या दरम्यान भाव मिळत आहे. दुसरीकडे हरभऱ्याला सणांमुळे मागणी आहे. त्यामुळे हरभऱ्याच्या भावात चढ उतार राहतील, असा अंदाज अभ्यासकांनी व्यक्त केला.

हिरवी मिरची टिकून

राज्यातील बाजारात हिरव्या मिरचीचे भाव टिकून आहेत. बाजारात हिरव्या मिरचीची आवक काहिशी वाढलेली दिसते. पण बाजारात मागणीही चांगली आहे. त्यातच नुकत्याच झालेल्या पावसाचा मिरची पिकाला मोठा फटका बसला. त्यामुळे मिरचीला उठाव मिळत आहे. बाजारात मिरचीचे भाव सध्या ३ हजार ते ४ हजार रुपयांच्या दरम्यान भाव मिळत आहे. पुढच्या काळात बाजारातील मिरची आवक काहिशी वाढू शकते, असा अंदाज आहे. त्यामुळे मिरचीचे भाव टिकून राहू शकतात, असा अंदाज बाजारातील व्यापारी व्यक्त करत आहेत.