Yavatmal News : जिल्ह्यात मंगळवारी (ता. ४) जोरदार पावसाने हजेरी लावली. दिग्रस तालुक्‍यातील तुपटाकळीसह बेलोरा शिवारातील शेतीला याचा जबर फटका बसला. या नुकसानग्रस्त शेतीची काँग्रेस नेते माणिकराव ठाकरे यांनी बुधवारी (ता. ५) पाहणी केली. मदतीसाठी शासनस्तरावर पाठपुरावा करण्याची ग्वाहीदेखील त्यांनी या वेळी दिली.

यंदाच्या खरीप हंगामात सुरुवातीला पावसाने दडी मारल्याने शेतकऱ्यांची चिंता वाढली होती. काही हवामान तज्ज्ञांच्या आवाहनावरून अनेक शेतकऱ्यांनी पेरणी आटोपली. मात्र त्यानंतर पावसाने दडी मारल्याने अनेकांवर दुबार पेरणीची वेळ आली आहे.

अशातच मंगळवारी जिल्ह्याच्या अनेक भागांत १०० मिमीपेक्षा अधिक पावसाची नोंद करण्यात आली. दिग्रस तालुक्‍यातील तुपटाकळी, कलगाव, सिंगद या मंडलांत १२५.२५ मिमीपेक्षा अधिक पाऊस झाला.

त्यामुळे परिसरातील काही नाल्यांना पूर आल्याने त्याचे पाणी शेतात शिरल्याने अनेकांची शेती खरडून गेली आहे. या नुकसानग्रस्त भागातील शेतीची काँग्रेस नेते माणिकराव ठाकरे यांनी भेट देत पाहणी केली.

या वेळी शेतकरी निखील वानखडे, सुखदेव शुक्‍ला, प्रमोद वानखडे, राजेंद्र वानखडे, सुरेश शुक्‍ला, साहेबराव जगताप, राजकुमार वानखडे, अभिजित जगताप, पांडुरंग बिनगे, ज्ञानेश्‍वर बिनगे, संगीत जगताप, चंद्रकांत शेंबडे, धनराज शेंबडे, सुभाष रसाळ, संतोष शुक्‍ला, संजय जगताप उपस्थित होते.