Sangli News : सांगली जिल्ह्यातील आटपाडी येथे शेतकऱ्यांसाठी मेंढी व शेळी पालन प्रशिक्षण सुरू आहे. दरम्यान हा कार्यक्रम पुण्यश्लोक अहिल्यादेवी होळकर मेंढी व शेळी विकास प्रक्षेत्र रांजणी (ता. कवठेमहांकाळ) व आटपाडी पंचायत समितीच्या पशुसंवर्धन विभागातर्फे आयोजित करण्यात आला आहे. या शिबीरात शेतकऱ्यांची लुबाडणूक होत असल्याचा प्रकार समोर आला आहे.

प्रशिक्षण शुल्क पाचशे रुपये असताना एक हजार रुपये घेण्यात आले. जादाचे पाचशे रुपये चहा व नाष्ट्यासाठी असल्याचे उपस्थित अधिकाऱ्यांनी सांगितले. मात्र, प्रशिक्षणादरम्यान केवळ एक समोसा व चहा देऊन शेतकऱ्यांची बोळवण करण्यात आली असल्याचा प्रकार समोर आला आहे.

मिळालेल्या माहितीनुसार, सांगली जिल्ह्यातील आटपाडी पंचायत समितीमध्ये १८ ते ३० ऑगस्ट दरम्यान शेळी व मेंढीपालन प्रशिक्षण शिबिर ठेवण्यात आले आहे. दरम्यान या शिबिराच्या नियमानुसार शेतकऱ्यांकडून ५०० रुपये शुल्क आकारण्यात येते. मात्र, प्रशिक्षणाचे आयोजक आटपाडी पशुसंवर्धन विभाग यांनी प्रशिक्षण शुल्क पाचशे रुपये असताना शेतकऱ्यांकडून चहा व नाष्ट्यासाठी अधिकचे पाचशे रुपये शुल्क आकारले आहे. या शिबिरास साठहून अधिक शेतकऱ्यांनी सहभाग घेतला आहे.

शासनाच्या योजनांची पूर्ण माहिती व प्रशिक्षण लाभार्थी शेतकऱ्यांना व्हावे यासाठी अशा शिबिराचे आयोजन अत्यल्प दरामध्ये करण्यात येत असते. मात्र, आटपाडी पंचायत समितीच्या पशुसंवर्धन विभागाने या शिबिराच्या माध्यमातून हजारो रुपये कमावण्याचा उद्योग चालविल्याचा आरोप उपस्थित शेतकऱ्यांनी केला.

प्रशिक्षणार्थी शेतकऱ्यांना प्रतिदिन २० रुपयेप्रमाणे तीन दिवसांसाठी ६० रुपयांचा नाष्टा देऊन बाकीचे रुपये कोणाच्या खिशात घातले जाणार आहेत? याबाबत प्रश्न उपस्थित केला जात आहे.

याबाबत आटपाडीचे पशुसंवर्धन अधिकारी अविनाश चव्हान यांनी दिलेल्या माहितीनुसार, शेतकरी शेळी-मेंढी पालकांना प्रशिक्षण घेण्यासाठी रांजणी येथे जावे लागते. मात्र, प्रशिक्षणार्थ्यांच्या विनंतीनुसार आम्ही आटपाडी पंचायत समितीमध्ये तीन दिवसांचे प्रशिक्षण ठेवले आहे. दोन दिवस आटपाडी येथे चहा, नाष्टा व प्रशिक्षण देण्यासाठी येणाऱ्या तज्ज्ञांच्या खर्चासाठी पाचशे रुपये जास्तीचे घेतले आहेत. अशी माहिती त्यांनी दिली.