Abdul Sattar : नाफेड आणि राष्ट्रीय उपभोक्ता सहकारी संघामार्फत (एनसीसीएफ) खरेदी केला जाणारा कांदा देशातील घाऊक बाजारात कमी किंमतीत विकला जात आहे. यामुळे व्यापाऱ्यांना व्यापार करणे अवघड झाल्याची तक्रार करत बुधवारी सकाळपासून व्यापारी लिलाव बंद करण्यात आले आहेत.

यामुळे बाजार समित्यांमध्ये कांद्याचे लिलाव जवळपास ठप्प झाले आहेत. जिल्ह्यात सध्या प्रतिदिन एक लाख क्विंटलचे लिलाव होतात. व्यापाऱ्यांच्या पवित्र्यामुळे प्रतिदिन २० ते २५ कोटींची उलाढाल थंडावली आहे.

यावर पणन मंत्री अब्दुल सत्तार यांनी व्यापाऱ्यांना थेट इशारा दिला आहे. ते म्हणाले की, विविध कारणे देऊन व्यापारी लिलाव बंद ठेवल्याने शेतकऱ्यांचे नुकसान होते आहे. त्यामुळे लिलाव बंद ठेवणाऱ्या व्यापाऱ्यांवर कडक कारवाई करणार असल्याचे पणन मंत्री अब्दुल सत्तार यांनी सांगितले. सत्तार येवला येथे एका खासगी कार्यक्रमास आले होते.

सध्या राज्यात गणपती आगमनाने सणासुदीचा काळ आहे. या काळात लिलाव बंद ठेवणे अयोग्य आहे. जे व्यापारी लिलाव बंद ठेवतील त्यांच्यावर कडक कारवाई करावी असे आदेश आपण पणन आयुक्त व नाशिक जिल्हाधिकारी यांना दिले असल्याचे यावेळी सत्तार यांनी सांगितले.

जोपर्यंत व्यापार करणे परवडत नाही, तोपर्यंत बाजार समितीतील लिलावात सहभागी न होण्याचा निर्णय नाशिक जिल्हा कांदा व्यापारी संघटनेने घेतला आहे. त्यामुळे लासलगाव या मुख्य बाजार समितीसह अनेक बाजार समित्यांमध्ये शुकशुकाट आहे.

दरम्यान कांदा लिलाव बंद असल्याने शेतकरी कांदा लिलावासाठी बाजार समितीमध्ये येत नसल्याचे दिसून येत आहे. लिलाव ठप्प झाल्यामुळे ऐन सणासुदीत पुन्हा कांदा उत्पादक शेतकऱ्यांवर संकट आल्याचे दिसून येत आहे. व्यापाऱ्यांच्या प्रश्नावर चर्चा करण्यासाठी पणन मंत्र्यांनी २५ सप्टेंबर रोजी संघटनेला चर्चेसाठी बोलावण्यात आले आहे.