पुणे : ‘देशभरातील नदी, जलसंवर्धन, (River Conservation) सांडपाणी प्रक्रिया (Waste Water Treatment) पाण्याचा फेरवापर’ या विषयांवर चर्चा करण्यासाठी पुण्यात १३ आणि १४ फेब्रुवारी रोजी दोन दिवसांची राष्ट्रीय नदी परिषद (National River Conference) होणार आहे.

या परिषदेचे संयोजन करण्यासाठी केंद्र शासनाकडून पुणे महापालिकेकडे आयोजक पदाची जबाबदारी देण्यात आली आहे.

या परिषदेत देशभरातील प्रमुख ४४ शहरांचे प्रतिनिधी उपस्थित असतील. नदी संवर्धनासाठी राबविण्यात येत असलेल्या प्रकल्पांच्या माहितीची देवाणघेवाण होणार आहे.

या परिषदेमध्ये आंतरराष्ट्रीय व राष्ट्रीय पातळीवरील तज्ज्ञ, शास्त्रज्ञ, अभ्यासक, विविध महापालिकांचे आयुक्त, वरिष्ठ अधिकारी, पाण्यासंबंधी काम करणाऱ्या स्वयंसेवी व सामाजिक संस्थांच्या प्रतिनिधींचा समावेश असेल.

या परिषदेचे नाव ‘धारा’ असे असणार आहे. तलावांचे पुनरुज्जीवन, पाणी व्यवस्थापन, नदीकाठ सुधार, सांडपाण्यावर प्रक्रिया, पूर व्यवस्थापन, जल पुनर्भरण, भूजल व्यवस्थापन, नदी व अर्थकारण अशा विविध आनुषंगिक विषयांवर या परिषदेत चर्चा होईल. इस्राईल, जपान, डेन्मार्क, ऑस्ट्रेलिया यांसह अन्य देशांमधील नद्यांचे व्यवस्थापन, पाणीपुरवठा आदी बाबींवरही चर्चा होणार आहे, अशी माहिती मनपा आयुक्त विक्रमकुमार यांनी दिली.