Wild Vegetables: खानदेशात रानभाज्या दाखल

Jalgaon News: खानदेशात रानभाज्यांची सातपुडा पर्वतालगतच्या मोठ्या गावांसह लहान शहरे व अन्य भागांत रेलचेल दिसत आहे. करटुल्यांची मोठ्या प्रमाणावर आवक होत आहे. यंदा रानभाज्यांचे दर २०० ते २५० रुपये प्रतिकिलो असे आहेत.

सातपुड्यालगतची मंडळी रानभाज्या विक्रीसाठी आणत आहेत. सध्या बाजारात करटुले, दोडी, चिल्याची भाजी व अन्य रानभाज्या विक्रीसाठी येत आहेत.

या भाज्या वजनाला हलक्या, आरोग्यदायी असल्याने शहरातील मंडळी याची खरेदी करतात. अनेक भागांत मुख्य मार्ग, मुख्य बाजारपेठांत दोडी, चिल्याची भाजी, करटुली विक्रीसाठी दिसत आहेत. करटुल्यांची आवक मागील महिन्यात सुरू झाली. दोडीच्या फुलांची आवकही मागील महिन्यात अधिक होती.

या महिन्यातही काही भागात त्यांची आवक सुरू आहे. तर चिल्याची भाजी, केळी व अन्य बागायती क्षेत्रांत सहज उपलब्ध होत असून, त्याचीही बऱ्यापैकी विक्री होत आहे. चिल्याची भाजी कमाल ८० रुपये प्रतिकिलो या दरात विक्रीस उपलब्ध आहे. दोडीचे दर २०० रुपये प्रतिकिलो असे आहेत. तर करटुल्यांचे दरही १८० ते २०० रुपये प्रतिकिलो असे आहेत. सातपुड्यातील व अन्य मंडळी या रानभाज्या तोडून आठवडी व अन्य बाजारांत विक्री करीत आहे.

सर्वच शहरांत आवक : जळगाव जिल्ह्यात चोपडा, यावल, जामनेर, मुक्ताईनगर, रावेर, धुळ्यातील शिरपूर, नंदुरबारातील शहादा, तळोदा, अक्कलकुवा, नवापूर, साक्री, धुळे, चाळीसगाव, पाचोरा आदी भागांत रानभाज्या विक्रीस येत आहेत. जामनेर, पाचोरा, चाळीसगाव भागांत सातमाळा, अजिंठा डोंगरातील रानभाज्या येत आहेत.

तर चोपडा, रावेर, यावल, शहादा, तळोदा, शिरपूर, जळगाव, यावल आदी भागांत सातपुड्यातील रानभाज्या विक्रीस येत आहेत. या रानभाज्यांसाठी पर्वतीय क्षेत्रात. खोऱ्यांत दिवसभर चिखल, काटेरी झुडपे पार करीत फिरावे लागते, असे विक्रेते सांगतात.