Monsoon Session: राज्यातील अवैध सावकारांवर कारवाई करू; सहकारी मंत्री बाबासाहेब पाटील

Pune News: राज्यात अवैध सावकारांनी शेतकऱ्यांची ७७१ हेक्टर जमीन हडपण्याचा प्रयत्न केला. परंतु सहकार विभागाने या प्रकरणात योग्य कारवाई करून शेतकऱ्यांना जमीन परत मिळवून दिली आहे, अशी माहिती राज्याचे सहकारी मंत्री बाबासाहेब पाटील यांनी बुधवारी (ता.१६) दिली. राज्यातील अवैध सावकारीचा मुद्दा प्रश्नोत्तरच्या तासात शिवसेना उबाठा गटाचे आमदार संजय देरकर यांनी उपस्थित केला होता. या चर्चेत नाना पटोले, समीर कुणावार यांनी सहभाग घेतला.

सहकार मंत्री पाटील म्हणाले, "राज्यातील अवैध सावकारीच्या १० हजार तक्रारी दाखल झाल्या होत्या. त्यापैकी ८ हजार १०० तक्रारीमध्ये तथ्य नसल्याचे आढळून आले. परंतु सहकार विभागाने शेतकऱ्यांच्या जमिनी हडपणाऱ्या अवैध सावकारांवर कारवाई केली आहे. तसेच जिल्हाधिकारी स्तरावरील समिती वारंवार बैठक घेऊन योग्य ती कारवाई करत आहोत. डीडीआर कार्यालयात अवैध सावकारीबाबत एक स्वतंत्र कक्ष स्थापन केला आहे." असंही पाटील म्हणाले.

ज्या सावकारांना परवाने दिले आहेत, त्यांनी ऑफिस किंवा घरासमोर फलक लावणे बंधनकारक आहे. त्यावर बारा महिन्यांसाठी व्याजाचे दर लावण्याचे आदेश परिपत्रक काढून देण्यात आले आहेत, असंही मंत्री पाटील यांनी सांगितले. 

राज्यातील बॅंकां शेतकऱ्यांना सिबिलची सक्ती करून पिक कर्ज नाकारतात. त्यामुळे शेतकऱ्यांना खाजगी सावकारांकडून कर्ज घ्यावं लागतं. परंतु अवैध सावकारी वाढल्याने शेतकऱ्यांना जाच सहन करावा लागत आहे. त्यावर राज्य सरकारने काय कारवाई केली, असा प्रश्न पटोले यांनी उपस्थित केला. 

तसेच इसारपत्राच्या नावाखाली सावकार शेतकऱ्यांची जमीन लिहून घेतात. त्यामुळे या प्रकरणाला आळा घालण्यासाठी सुमोटो आदेश तहसीलदारांना देण्याची मागणी समीर कुणावर यांनी केली. त्यावर सहकारमंत्री पाटील यांनी योग्य ती कारवाई करण्याचे आदेश तहसीलदार आणि उपजिल्हाधिकाऱ्यांना देऊ असंही सांगितलं.