Rabi Season : रब्बीसाठी दोन लाख १० हजार टन खते मंजूर

Pune News : शेतकऱ्यांनी रब्बी हंगामाची तयारी सुरू केली आहे. शेतकऱ्यांची गरज लक्षात घेऊन जिल्हास्तरावरून करण्यात आलेल्या मागणीनुसार विभागीय कृषी सहसंचालक कार्यालयामार्फत कृषी आयुक्त कार्यालयाकडून दोन लाख १० हजार टन खते मंजूर करण्यात आली आहे. या खतांचे लवकरच वाटप करण्यात येणार असल्याची माहिती कृषी विभागाच्या सूत्रांनी दिली.

यंदा जिल्ह्यात खरिपात शेतकऱ्यांसाठी दोन हजार ४३ कोटी ४३ लाख रुपयांचे पीक कर्जाचे उद्दिष्ट ठेवले होते. त्यापैकी २ हजार २६२ कोटी ७६ लाख ५६ हजार रुपयांचे पीककर्ज घेतले आहे. त्यातच चांगला पाऊस पडल्याने भूजल पातळीत वाढ झाली आहे. पश्चिम पट्ट्यात पुरेसा पाऊस झाल्याने धरणे भरली आहेत.

पूर्व पट्ट्यात चांगला पाऊस झाल्याने काही प्रमाणात पाणीपातळी वाढली आहे. त्यामुळे रब्बी हंगाम शेतकऱ्यांना चांगला जाण्याची शक्यता आहे. परंतु आर्थिक अडचणी असल्याने रब्बी हंगामातील पिकांची पेरणी करण्यासाठी कर्ज काढण्याची वेळ शेतकऱ्यांवर आली आहे. त्यासाठी पीडीसीसी बॅंकेने ६८१ कोटी २३ लाख रुपयांचे उद्दिष्ट ठेवले आहे.

रब्बी हंगामात ज्वारीची पेरणी क्षेत्रात काही प्रमाणात वाढणार असल्याची स्थिती आहे. जिल्ह्यात रब्बीचे एकूण २ लाख २९ हजार ७१२ हेक्टर क्षेत्र आहे. चालू वर्षी खरिपात झालेल्या चांगल्या पावसामुळे रब्बी ज्वारीच्या पेरणीच्या क्षेत्रात मोठ्या प्रमाणात वाढ होण्याची शक्यता आहे. कृषी विभागाने जवळपास दोन लाख ८० हजार ५९५ हेक्टरवर पेरणी होण्याचा दावा कृषी विभागाने केला आहे. यात ज्वारीची सुमारे एक लाख ३० हजार हेक्टरवर पेरणीची शक्यता आहे. रब्बी ज्वारीपाठोपाठ गव्हाचे ४५ हजार हेक्टर क्षेत्र आहे. हरभऱ्यांचे ३६ हजार हेक्टर क्षेत्र आहे.

पॉस मशीनवर नोंदणी केल्याशिवाय शेतकऱ्यांना खते मिळणार नसल्याची माहिती कृषी विभागाच्या सूत्रांनी दिली.

महिनानिहाय मंजूर केलेली खते (टनामध्ये)

महिना मागणी केलेली खते

ऑक्टोबर २४,९५३

नोव्हेबर ३२,०६२

डिसेंबर ४५,४३२

जानेवारी ४२,८८७

फेब्रुवारी ३१,६०६

मार्च ३३,७६०