Hingoli News: हिंगोली जिल्ह्यातील हळदीच्या उत्पादकतेत कंद सड, करपा रोगाचा प्राद्रुर्भाव आदी कारणांनी मोठी घट येत आहे. निविष्ठांची महागाई, मजुरीच्या दरातील वाढ, गतवर्षीच्या तुलनेत कमी बाजारभाव यामुळे हळद पीक आतबट्ट्याचे ठरत आहे. त्यामुळे शेतकऱ्यांच्या अर्थकारणाला फटका बसत आहे.
गादी वाफा (बेड) लागवड, ठिबक सिंचन पद्धती, विद्राव्य खते, सुक्ष्म अन्नद्रव्यांच्या वापरामुळे उत्पादकतेत वाढ झाली. गेल्या काही वर्षांत हळद लागवड ते काढणी, काढणी पश्चात कामांचे यांत्रिकीकरण झाले. त्यामुळे मजुरीवरील खर्च काही प्रमाणात कमी झाला. हळदीची सरासरी उत्पादकता एकरी २५ ते ३० क्विंटल आहे. मोजकेच शेतकरी एकरी ३५ ते ४० क्विंटल उत्पादन घेतात. २०२३ च्या जून अखेरपासून हळदीच्या दरात सुधारणा होऊन २० हजारांचा टप्पा पार केला होता.
दरात तेजी राहील या अपेक्षेने २०२४ मध्ये हिंगोली जिल्ह्यातील हळदीच्या क्षेत्रात २०२३ च्या तुलनेत ८ हजार हेक्टरने वाढ होऊन ३२ हजार हेक्टरवर लागवड झाली. परंतु अनेकवेळा अतिवृष्टी झाली. त्यामुळे कंद सडचा मोठ्या प्रमाणात प्रादुर्भाव झाला. परिणामी उत्पादकतेत मोठी घट झाली. सध्या जिल्ह्यातील हळद काढणी हंगाम अंतिम टप्प्यात आहे. मजुरांअभावी सुमारे २० टक्के हळदीची काढणी बाकी आहे. काढणी केलेले शेतकरी हळद शिजवणी, वाळवणी, चकाकी देणे आदी कामे करत आहेत. उत्पादनात मोठी घट येत असल्याचे शेतकरी सांगत आहेत.
हळद बेणे घरचे असेल एकरी ६० हजार रुपयांपर्यंत विकतचे बेणे असेल तर एकरी ८० ते ९० हजार रुपये खर्च लागतो. गतवर्षीच्या तुलनेत यंदा हळद काढणी तसेच शिजवणीच्या मजुरीच्या दरात जवळपास दुपटीने वाढ झाली आहे. तर बाजारभाव पाच ते सहा हजार रुपयांनी कमी मिळत आहेत. यामुळे निव्वळ नफा कमी उरत आहे. त्याचा परिणाम पुढील वर्षीच्या हळद लागवडीच्या क्षेत्रावर होऊ शकतो.
ॲग्रोवनचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.
