Sangli News : हळद लागवडीच्या काळात वाढते तापमान, गतवर्षी झालेला कमी पाऊस, आणि यंदाचा सततचा पाऊस यामुळे देशातील हळद उत्पादन घेणाऱ्या राज्यात या साऱ्याचा परिणाम हळद लागवडीवर झाला. त्यामुळे लागवड लांबणीवर पडली. त्यातच हळद बियाण्यांची टंचाई आणि वाढत्या दरामुळे शेतकऱ्यांनी लागवडीकडे पाठ फिरवली आहे. त्यामुळे देशात ३५ हजार हेक्टरने हळदीच्या क्षेत्रात घट झाली असल्याची माहिती हळद संशोधन केंद्राने दिली आहे.
देशात गत वर्षी म्हणजे सन २०२३-२४ मध्ये ३ लाख ५ हजार १८२ हेक्टरवर हळदीची लागवड झाली होती. गेल्या दोन ते तीन वर्षांत हळदीला चांगले दर मिळत असल्याने शेतकरी हळद लागवडीसाठी पुढे येत आहेत. गत वर्षी पाऊस कमी झाला. परिणामी पाण्याची टंचाई निर्माण भासू लागली. त्यामुळे उत्पादनही घटल्याने बियाण्यांचे उत्पादन कमी झाले.
मुळात गत वर्षी पाण्याची समस्या निर्माण झाल्याने हळद लागवड करायची की नाही, अशी द्विधा अवस्था शेतकऱ्यांनी निर्माण झाली होती. तसेच यंदाच्या हंगामातील लागवडीवर पाणीटंचाई आणि अतिउष्णतेचा परिमाण झाला. मे महिन्यात होणारी हळद लागवड शेतकऱ्यांना पुढे ढकलावी लागली. पाणीटंचाईच्या काळात उपलब्ध पाण्यावर शेतकऱ्यांनी हळद लागवड केली. जून महिन्यापासून पावसाला सुरुवात झाली. सतत पाऊस सुरू असल्याने शेतकऱ्यांना हळद लागवड करण्यासाठी अडथळे निर्माण झाले. अशा परिस्थितीतही पावसाने उसंत घेतल्यानंतर शेतकऱ्यांनी हळद लागवडीचे नियोजन करत लागवड पूर्ण केली.
दरम्यान, गतवर्षी हळदीच्या उत्पादनाबरोबर हळदीच्या बियाण्यांचेही उत्पादन घटल्याने बियाण्यांच्या दरात वाढ झाली. बियाण्यांची काही प्रमाणात कमतरता भासू लागली. त्यातच हळद उत्पादनाच्या वाढता खर्चामुळे यंदाच्या हंगामात शेतकऱ्यांनी हळद लागवडीकडे पाठ फिरवली आहे. त्यामुळे यंदा देशात २ लाख ७० हजार हेक्टरवर लागवड झाली आहे. गत वर्षीच्या तुलनेत यंदाच्या हंगामात ३५ हजार १८२ हेक्टर क्षेत्र घटले आहे.
उत्पादनात १५ टक्क्यांची घट शक्य
जून महिन्यापासून ऑक्टोबरअखेर पाऊस सुरू होता. हळद पीक आणि कंद वाढीच्या काळात पाऊस झाला. शेतात पाणी साचून राहिले. त्यामुळे कंदकूज रोगाचा प्रादुर्भाव झाला. त्याचबरोबर करपा रोगाचा प्रादुर्भाव वाढला. या दोन्ही रोगाचा फटका हळद पिकाची आणि कंदाची वाढ थांबली. परिणामी हळदीच्या उत्पादनात १५ टक्के घट होण्याचा अंदाज हळद संशोधन केंद्राने व्यक्त केला आहे.
ॲग्रोवनचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.