Tur Cultivation : खानदेशात पूर्वहंगामी तूर जोमात; १५ हजार हेक्टरवर लागवड

Jalgaon News : खानदेशात तुरीचे क्षेत्र यंदा वाढले आहे. पूर्वहंगामी किंवा सिंचनाची सुविधा असलेल्या क्षेत्रात तूर पीक जोमात आहे. यंदा खानदेशात सुमारे १५ हजार हेक्टरवर लागवड झाली आहे. तूर लागवड जळगाव जिल्ह्यात पाच ते सहा हजार हेक्टरवर केली जाते. मुक्ताईनगर, रावेर, जामनेर, बोदवड तालुक्यात लागवड अधिक असते.

उर्वरित भागात आंतरपीक म्हणून किंवा आपल्या कुटुंबापुरते उत्पादन काढण्यावर शेतकरी भर देतात. तुरीची व्यावसायिक शेती रावेर, यावल, मुक्ताईनगर, बोदवड, जामनेरात आहे. तर धुळ्यातील शिंदखेडा, शिरपूर आणि नंदुरबारमधील तळोदा, नवापूर भागांत काही शेतकरी तूर लागवड करतात.

संकरित, संशोधित वाणांच्या लागवडीवर शेतकरी भर देतात. गेल्या वर्षी एकरी तीन ते चार क्विंटल उत्पादन हाती आले. अतिपावसात पिकाचे नुकसान झाले. पण दर टिकून होते. किमान पाच हजार रुपये प्रतिक्विंटलचा दर मिळाला. तर काही शेतकऱ्यांनी मार्चमध्ये तुरीची विक्री करून सहा हजार रुपये प्रतिक्विंटलचा दर मिळविला.

दर सुरुवातीपासून टिकून होते. मुक्ताईनगर, रावेरात जलसाठे तापी नदीकाठी मुबलक आहेत. या भागात उत्तम व्यवस्थापन करून तुरीचे उत्पादन शेतकरी साध्य करतात. ठिबकवर लागवड केली जात आहे. एकरी नऊ क्विंटलचे उत्पादन या भागात काही शेतकरी घेतात. लागवड मे महिन्याच्या अखेरीस सुरू होते.

अनेक शेतकऱ्यांनी कोरडवाहू लागवडीचे नियोजन केले आहे. टिकून असलेले दर व उठाव यामुळे अनेक शेतकरी यंदा तूर लागवडीकडे वळले. जळगाव जिल्ह्यात ११ हजार हेक्टरवर तूर पीक आहे. पीकस्थिती चांगली आहे. त्यावर शेतकरी फवारणी घेत आहेत. तसेच या महिन्यातही पाऊस आल्याने कोरडवाहू क्षेत्रातील तुरीसही लाभ झाला आहे.