Crop Insurance : पीकविम्यासाठी तुपकरांची कृषी कार्यालयात धडक

Buldana News : गेल्या वर्षीच्या पीकविम्यापासून वंचित असलेल्या पात्र-अपात्र शेतकऱ्यांना तातडीने पिकविमा द्यावा, या मागणीसाठी क्रांतिकारी शेतकरी संघटनेते संस्थापक अध्यक्ष रविकांत तुपकर यांनी सोमवारी (ता. २) जिल्हा कृषी अधीक्षक कार्यालयात शेतकऱ्यांसह धडक दिली.

बुलडाणा जिल्ह्यात AIC पीकविमा कंपनीने गेल्या वर्षीच्या रब्बी हंगामातील पोस्ट हार्वेस्टिंगअंतर्गत पात्र असलेल्या व चुकीचे कारण दाखवून अपात्र केलेल्या एक लाख २६ हजार २६९ शेतकऱ्यांना अद्याप पीकविम्याचा मोबदला दिला नाही. त्याचबरोबर खरीप हंगामात चुकीची कारणे देऊन अपात्र केलेल्या ७० हजार ८३१ शेतकऱ्यांना पीकविमा देण्याचे कंपनीने मान्य केले आहे.

‘त्या’ शेतकऱ्यांनाही कंपनीने अद्याप पीकविम्याचा मोबदला दिला नाही. पीकविम्यापोटी जिल्ह्यातील शेतकऱ्यांना २३५ कोटी ५५ लाख रुपये रक्कम मिळणे अद्याप बाकी आहे. तातडीने ही रक्कम शेतकऱ्यांना मिळावी, अशी आमची मागणी आहे.

परंतु शासनाकडून उर्वरित हिस्सा मिळाल्यानंतरच या वंचित शेतकऱ्यांची पीकविमा रक्कम जमा करू, असे कंपनीकडून सांगितले जात आहे. त्यामुळे तातडीने शासन स्तरावर पाठपुरावा करून वंचित शेतकऱ्यांच्या खात्यावर रक्कम जमा करावी, अशी मागणी तुपकर यांनी जिल्हा कृषी अधीक्षक मनोज ढगे यांच्याकडे केली.

आचारसंहितेमुळे आम्ही शांत होतो, आता आचारसंहिता संपली आहे, त्यामुळे येत्या आठ दिवसांत वंचित पात्र-अपात्र शेतकऱ्यांच्या खात्यावर पीकविमा जमा करा, अन्यथ आक्रमक आंदोलन करणार असल्याचा इशारा तुपकर यांनी दिला.

या वेळी विनायक सरनाईक, नितीन राजपूत, आकाश माळोदे, अमोल मोरे, रामेश्वर अंभोरे, गजाननबाप्पू देशमूख, राहुल शेलार, महेंद जाधव, उमेशसिंग राजपूत, सदाशिव जाधव, भागवत धोरण, विजय बोराडे, गजानन कुटे, सतीश सुरडकर, संतोष शेळके यांच्यासह क्रांतिकारी शेतकरी संघटनेचे पदाधिकारी व शेतकरी उपस्थित होते.