Crop Insurance : सांगली जिल्ह्यातील १७ हजार शेतकऱ्यांनी घेतला पीकविमा

Sangli News : रब्बी हंगाम २०२४-२५ मध्ये पंतप्रधान पीकविमा योजनेत जिल्ह्यातील १७ हजार २९८ शेतकऱ्यांनी पीकविमा घेऊन १० हजार ४८६ हेक्टरवरील पिकांचे संरक्षण केले आहे. यामध्ये रब्बी ज्वारी (बागायत), रब्बी ज्वारी (जिरायत), गहू (बागायत), हरभरा व उन्हाळी भुईमूग या पिकांसाठी शेतकऱ्यांनी विमा घेतला आहे, अशी माहिती कृषी विभागाच्या सूत्रांनी दिली आहे.

२०२४-२५ रब्बी हंगामामध्ये शेतकरी अर्जदारांनी योजनेत सहभागी होताना प्रतिअर्ज केवळ १ रुपया भरून पीकविमा पोर्टलवर नोंदणी करण्याचे आवाहन कृषी विभागाने केले आहे. जिल्ह्यातील रब्बी हंगामातील पिकांना निसर्गाच्या लहरीपणाचा फटका सहन करावा लागतो. प्रतिकूल परिस्थितीमुळे पेरणी न झाल्यामुळे नुकसान होते.

तसेच पिकांच्या हंगामामध्ये पूर, पावसातील खंड, दुष्काळ, तसेच प्रतिकूल परिस्थितीमुळे पिकांच्या सरासरी उत्पन्नाच्या ५० टक्क्यांपेक्षा जास्त घट होते. तसेच पेरणीपासून काढणीपर्यंतच्या कालावधीत चक्रीवादळ, पूर, क्षेत्र जलमय होणे, भूस्खलन, कीड व रोग आदी बाबींमुळे उत्पन्नात येणाऱ्या घटीमुळे होणारे नुकसान, स्थानिक नैसर्गिक आपत्तीमुळे पिकांचे झाले तर, शेतकऱ्यांना त्याची भरपाई मिळावी यासाठी पीकविमा योजना सुरू केली आहे. त्यासाठी शेतकऱ्यांनी पीकविमा योजनेत अर्ज करणे आवश्यक आहे.

यंदाच्या रब्बी हंगामात जिल्ह्यातील १७ हजार २९८ शेतकऱ्यांनी विमा घेतला आहे. १० हजार ४८६ हेक्टरवरील पिकांना विमा घेऊन संरक्षण दिले आहे. ही योजना शेतकऱ्यांसाठी ऐच्छिक असून खातेदार शेतकऱ्यांव्यतिरिक्त कुळाने अगर भाडेपट्टीने शेती करणारे शेतकरीसुद्धा योजनेत भाग घेण्यासाठी पात्र राहणार आहेत.

शेतकऱ्यांना सहभागासाठी अंतिम मुदत रब्बी ज्वारीसाठी शनिवारी (ता. ३०), इतर रब्बी पिकासाठी १५ डिसेंबर तर उन्हाळी भुईमुगासाठी ३१ मार्च २०२५ अखेर आहे. ही योजना राबविण्यासाठी कार्यान्वयीन यंत्रणा म्हणून जिल्ह्यासाठी भारतीय कृषी विमा कंपनी या ‍विमा कंपनीची निवड केली आहे.

जिल्ह्यात रब्बी हंगामातील पीकविमा योजना सुरू झाली आहे. शेतकऱ्यांनी या योजनेत सहभागी पोर्टलवर नोंदणी करावी. या योजनेत जास्तीत जास्त शेतकऱ्यांनी सहभागी व्हावे. - विवेक कुंभार, जिल्हा अधीक्षक कृषी अधिकारी