Kolhapur Rain : कोल्हापूर जिल्ह्याला वळवाचा तडाखा, पूर्व, दक्षिण भागात जोरदार पाऊस

Torrential Rain Kolhapur : मागच्या चार दिवसांपासून कोल्हापूर जिल्ह्यात विविध भागात वादळी वाऱ्यासह जोरदार पाऊस पडत आहे. दरम्यान जिल्ह्यात सर्वाधिक उस क्षेत्र असल्याने आडसाली आणि खोडवा ऊस पिकांना हा पाऊस पोषक असल्याचे बोलले जात आहे.

यंदा महिन्याभरात ४ ते ५ वेळा वळीव पाऊस झाल्याने पिकांची वाढ मोठ्या प्रमाणात होत असल्याचे चित्र पहायला मिळत आहे.

कोल्हापूर जिल्ह्यात शिरोळ, हातकणंगले आणि कागल तालुक्यात मध्यम ते जोरदार पाऊस झाला. शिरोळ तालुक्याला गुरुवारी (ता. १६) वळवाच्या पावसाने झोडपून काढले. उसासह सर्वच पिकांना पोषक असणाऱ्या पावसाने तालुक्यातील विविध गावांतील आठवडा बाजारात मात्र त्रेधातिरपीट उडविणारा ठरला. शहरातील वीजपुरवठा काही काळ खंडित करण्यात आला.

पावसाने वीटभट्टी मालकांचे नुकसान झाले, तर जयसिंगपूर शाहूनगर, उदगाव, कुरुंदवाड आठवडी बाजारातील जनजीवन काही काळ विस्कळीत झाल्याने दैना उडाली. गुरुवारी सकाळपासूनच हवेत मोठ्या प्रमाणात उष्मा जाणवत होता. यामुळे अंगाची लाही लाही होऊन जीव कासावीस झाला होता. दुपारपासूनच ढगाळ वातावरण निर्माण झाले तसेच ढगांचा गडगडाट सुरू होता.

अचानक आलेल्या पावसामुळे शिरोळ तालुक्यातील अनेक आठवडी बाजारातील व्यापारी भाजी विक्रेते यांची त्रेधातिरपट उडाली, तर खरेदीसाठी आलेल्या ग्राहकांची तारांबळ उडाली होती. अचानक आलेल्या पावसामुळे रस्त्यावरून जाणाऱ्या दुचाकीस्वारांनी पावसापासून संरक्षण होण्याकरिता आडोसा शोधून त्या ठिकाणी थांबल्यामुळे रस्त्यावरील वाहनांची वर्दळ कमी झाली होती.

दरम्यान, कोल्हापूर शहरात दुपारी झालेल्या सोसाट्याच्या वाऱ्यामुळे आज ताराबाई पार्क येथील महाराणी ताराबाई उद्यान परिसरात एका झाडाची मोठी फांदी रस्त्यात कोसळली. त्यामुळे काही प्रमाणात वाहतूक मार्गात बदल केला. अग्‍निशमन दलाच्या जवानांनी तेथील फांदी बाजूला काढून वाहतूक सुरळीत केली. याव्यतिरिक्त शहरात काहीही नुकसान झाले नसल्याचे अग्‍निशमन दलातून सांगण्यात आले.