ZP School : कॉन्व्हेंट संस्कृतीच्या काळात जिल्हा परिषद शाळेची भरारी

Yavatmal News : ‘खरा तो एकची धर्म जगाला प्रेम अर्पावे’, असा विचार साने गुरुजींनी दिला होता. विचारांचा हाच वारसा जपत विडूळ (ता. उमरखेड) नागेश मिरासे या शिक्षकाने उपक्रमशीलतेच्या बळावर मुलांना शिक्षणाच्या प्रवाहात आणण्याची मोठी मोहीम हाती घेतली आहे.

विशेष म्हणजे कॉन्व्हेंट संस्कृतीच्या वाढत्या प्रस्थामुळे शासकीय शाळांच्या विस्थापनाचा हा काळ असताना त्यांच्या या शाळेत मात्र विद्यार्थी पटसंख्या १११ इतकी आहे. विडूळमध्ये मिश्र वस्ती असलेल्या या भागाला आबादी असे म्हटले जाते. या परिसरात शिक्षणाचे प्रमाण कमी असल्याने मजुरी कामावर जाणे आणि व्यसनाधीनता अशी समस्या होती.

आर्थिक गरजा भागविण्यासाठी पालकांसमवेत मुलेही कामावर जायची. त्यामुळे जिल्हा परिषदेची आबादी शाळा उजाड राहत होती. मुलेच नसल्याने शाळेच्या देखभालीकडेही साहजीकच दुर्लक्ष झाले. भिंती काळवंडलेल्या, दरवाजे, खिडक्‍या तुटलेल्या, परिसरात घाणीचे साम्राज्य अशी भयावह अवस्था होती.

जून २०२३ मध्ये या शाळेची सुत्रे नागेश मिरासे या शिक्षकाकडे आली. त्या वेळी ८५ पटसंख्या होती. परंतु हे विद्यार्थी देखील शाळेत फिरकत नव्हते. नागेश मिरासे यांनी पालकांशी संवाद साधत त्यांना शिक्षणाचे महत्त्व पटवून दिले. त्याच्या सातत्यपूर्ण प्रयत्नांतून विद्यार्थ्यांची पावले शाळेकडे वळण्यास सुरुवात झाली. याची दखल घेत मिरासे यांनी शाळा परिसरात सुधारणांवर भर दिला.

त्यासाठी मोठा निधी लागणार होता. परंतु इच्छा तिथे मार्ग असतो या विचाराप्रमाणे त्यांना पैशांच्या समस्येवर सामाजिक संस्थांचा तोडगा सापडला. अनेक संस्थांशी संपर्क साधत त्यांनी निधीची जुळवाजुळव केली. त्यातून शाळा परिसरात गट्टू बसविण्यात आले. खिडक्‍या, दरवाजे नव्याने लावण्यात आले.

मुला-मुलींसाठी स्वच्छतागृह, शालेय परसबाग तयार करण्यात आली. शाळेच्या बोलक्‍या भिंतीदेखील लक्ष वेधून घेतात. त्याही पुढे जात संगणक शिक्षणाची सोय या ठिकाणी करण्यात आली आहे. यातूनच वर्ग एक ते पाच पर्यंतच्या शिक्षणाची सोय असलेल्या या शाळेत उपक्रमशीलतेच्या परिणामी सर्व वर्गातील प्रवेश फुल्ल आहेत. विशेष म्हणजे खासगी शाळांकडे जाणाऱ्या पालकांनी देखील आपल्या पाल्यांना शिक्षणासाठी या शाळेत घातले आहे.