Crop Damage Compensation : नंदुरबारातील नुकसानग्रस्तांना मदतनिधी केव्हा मिळेल?

Nandurbar News : काकर्दे खुर्द, काकर्दे दिगर, हिंगणी, तोरखेडा, अभाणपूर, कोंढावळ, खापरखेडा (ता. शहादा) परिसरास नोव्हेंबर २०२३ मध्ये विजेचा कडकडाट, ढगांचा गडगडाटासह पाऊस झाला होता.

अतिपाऊस व जोरदार वादळी वाऱ्यांमुळे परिसरातील शेकडो एकरातील फळबागांचे नुकसान झाले होते. यातील नुकसानग्रस्तांना अद्याप भरपाई मिळालेली नाही.

केळी, पपई, हरभरा, टोमॅटो, डांगरमळ्यांचे मोठे नुकसान झाले. तोंडाशी आलेला घास निसर्गाने हिरावल्याने शेतकरी अडचणीत आले. महसूल व कृषी विभागाने परिसरातील शेत शिवारात नुकसानीचे पंचनामे केले होते.

शहादा तालुक्यातील काकर्दे दिगर, काकर्दे खुर्द, हिंगणी, तोरखेडा, अभणपूर, खापरखेडा, कोंढावळ परिसरात आठवड्यात दुसऱ्यांदा सुमारे अर्धा तास पाऊस झाला होता. वादळी पावसामुळे शेतकऱ्यांच्या शेकडो एकरातील फळबागा केळी, पपई अक्षरशः आडवी पडली असून, लागलेली फळे जमिनीवर पडून लाखो रुपयांचे नुकसान झाले.

काकर्दे खुर्द, दिगर शिवारात ढगफुटीसदृश पावसाने, सोसाट्याच्या वाऱ्यासह रुद्ररूप धारण केले होते. पावसासह वाऱ्याच्या तडाख्याने केळी, पपई या पिकांची झाडे पूर्णतः आडवी पडली होती. यामुळे शेतात फळांचा खच पडला होता.