Kharip Season : लातुरातील हरिजवळग्यात बनावट डीएपी खताचा साठा जप्त

Latur : खरीप हंगामातील पेरण्यासाठी डीएपी खताची शेतकऱ्यांकडून होणाऱ्या मोठ्या मागणीचा फायदा घेत काहींनी गावागावात जाऊन शेतकऱ्यांना बनावट डीएपी खताची विक्री करण्यास सुरुवात केली आहे. पालकमंत्री शिवेंद्रसिंहराजे भोसले यांनी काही दिवसांपूर्वीच अशा प्रकाराची दखल घेऊन कारवाईचे आदेश कृषी विभागाला दिले होते. त्यानुसार कृषी विभाग दक्ष झाला असतानाच सोमवारी (ता. २६) सकाळी हरिजवळगा (ता. निलंगा) येथे बनावट डीएपी खत विक्रीचा प्रकार उघडकीस आला. जिल्हा परिषदेच्या कृषी विभागाने कारवाई करत विक्रीसाठी आलेला संशयास्पद डीएपी खताचा साठा जप्त केला.

या कारवाईत डीएपी खताचे ऐंशी पोत्यासह हा खत घेऊन आलेला टेम्पोही पोलिसांनी जप्त केला आहे. या प्रकरणी दोघांविरुद्ध गुन्हा दाखल झाला असून एकाला अटक करण्यात आली आहे. कृषी विभागाने डीएपी खताचा आग्रह न धरता पर्यायी खताचा वापर करण्याचे वाहन केले तरी शेतकऱ्यांकडून डीएपी खताचा आग्रह कमी होत नसल्याचे चित्र आहे. या स्थितीत काही कृषी सेवा केंद्रांकडून डीएपी खताची काळ्या बाजारात विक्री सुरू असून काही ठिकाणी बनावट डीएपी खत विक्रीतून शेतकऱ्यांची फसवणूक सुरू आहे.

हरिजवळगा येथील प्रकरणात निलंगा पंचायत समितीचे कृषी अधिकारी नारायण कुटवाड यांनी कासार सिरसी पोलीस ठाण्यात तक्रार दिली. त्यानुसार त्यांना हरिजवळगा येथे एक जण टेप्मोमध्ये बनावट डीएपी खत घेऊन विक्रीसाठी आल्याची माहिती मिळाली. त्यानंतर त्यांच्यासह कृषी विकास अधिकारी डी. टी. सुपेकर व मोहीम अधिकारी एम. बी. बिडबाग यांनी पोलिसांच्या मदतीने गावात जाऊन संशयित टेम्पो पकडला. त्यात डीएपी खताची ऐंशी पोती आढळून आली.

चालक महताब गफुरसाब हलगरे याने हे खत आनंदवाडी येथील मराठवाडा कृषी सेवा केंद्राचे मालक फैयाज खमरुद्दीन बिराजदार यांच्या सांगण्यावरून हरिजवळगा येथील शेतकऱ्यांना विक्रीसाठी आणल्याचे सांगितले. त्यावरून अधिकाऱ्यांनी डीएपी खताचा साठा व टेम्पो जप्त करून चालक हलगरे याला पोलिसांच्या ताब्यात दिले. श्री. कुटवाड यांनी दिलेल्या फिर्यादीवरून पोलिसांनी हलगरे व फयाज बिराजदार यांच्याविरुद्ध गुन्हा दाखल केला.