Ladki Bahin Yojana : एक लाख ‘लाडक्या बहिणीं’च्या पडताळणीला सुरुवात

Solapur News : मुख्यमंत्री माझी लाडकी बहीण योजनेच्या पडताळणीनंतर राज्यातील ४२ लाखांवर महिला अपात्र ठरल्या आहेत. त्यात सोलापूर जिल्ह्यातील सव्वादोन लाख महिला आहेत. सध्या माहिती व तंत्रज्ञान विभागाकडील माहितीवरून शासनाने जिल्हाधिकाऱ्यांना याद्या पाठविल्या आहेत.

त्यात वयाची अट पूर्ण नसतानाही अर्ज केलेल्या आणि कुटुंबातील दोनपेक्षा जास्त लाभार्थी महिला आहेत. सोलापूर जिल्ह्यातील ९९ हजार ८०० लाडक्या बहिणींची आता अंगणवाडी सेविकांमार्फत पडताळणी सुरू आहे.

विधानसभा निवडणुकीच्या निकालानंतर लाडक्या बहिणींची निकषांच्या आधारे पडताळणी सुरू झाली. सुरवातीला चारचाकी वाहन असलेल्यांची तपासणी झाली. त्यानंतर संजय गांधी निराधार योजना, नमो शेतकरी महासन्मान योजना, याशिवाय शासनाच्या वैयक्तिक लाभाच्या योजनेचा लाभ घेणाऱ्यांची पडताळणी झाली. सरकारी नोकरदार महिला, बोगस पुरुष लाभार्थींचीही पडताळणी झाली.

आता माहिती व तंत्रज्ञान विभागाकडील माहितीवरून वयोगट व एकाच कुटुंबातील दोनपेक्षा जास्त लाभार्थींची तपासणी सुरू आहे. त्यानुसार सोलापूर जिल्ह्यातील १६ हजार ७८ महिला वयाच्या निकषात अपात्र ठरल्या आहेत.

अनेकांनी वय ६५ पेक्षा जास्त असतानाही कमी वय असल्याचे दाखवून तर २१ पेक्षा कमी वयोगटातील तरुणींनी २१ पेक्षा जास्त वय असल्याचे दाखवून अर्ज केले आहेत. दुसरीकडे जिल्ह्यातील ८३ हजार ७२२ महिलांच्या कुटुंबातील दोन महिला योजनेचा लाभ घेत असताना देखील त्यांनी अर्ज केले आहेत. त्यांची पडताळणी करून वस्तुनिष्ठ अहवाल शासनाला पाठविला जाणार आहे.

‘आयकर’च्या माहितीवरून तीन लाख महिला अपात्र?

योजनेत धनाढ्य विशेषतः कुटुंबाचे वार्षिक अडीच लाखांपेक्षा जास्त आहे, अशा महिला देखील आहेत. या पार्श्वभूमीवर राज्य शासनाने इन्कम टॅक्स विभागाला यापूर्वीच पत्रव्यवहार केला आहे. राज्यातील अडीच लाख रुपयांपेक्षा जास्त उत्पन्न असलेल्या कुटुंबांची यादी मागितली आहे. ‘आयकर’कडील माहिती प्राप्त झाल्यावर लाडकी बहीण योजनेतील जिल्ह्यातील आणखी अंदाजे तीन लाख महिला अपात्र ठरतील, अशी माहिती विश्वसनीय सूत्रांनी दिली.

लाडकी बहीण योजनेची सद्य:स्थिती

एकूण लाभार्थी

११,०९,४७८

सुरवातीचा दरमहा निधी

१६६,४२,१७०००

पडताळणीत अपात्र लाभार्थी

२.२८ लाख

आता दरमहा लागणारा निधी

१३२.१५ कोटी