Mulberry Cultivation : कृषी, जिल्हा परिषदेकडून तुती लागवडीच्या नोंदणीकडे दुर्लक्ष

Sangli News : महारेशीम अभियान अंतर्गत जिल्ह्याला ७०० एकरांवर तुती लागवडीचे लक्षांक रेशीम संचालनायलाद्वारे देण्यात आले होते. त्यापैकी जिल्हा रेशीम विभागाने २४६ शेतकऱ्यांनी २५७ एकरांवर तुती लागवडीसाठी नोंदणी केली आहे. मात्र जिल्हा कृषी विभाग आणि जिल्हा परिषदेने या योजनेत शेतकऱ्यांची नोंदणी करण्याकडे दुर्लक्ष केले आहे. त्यामुळे केवळ जिल्हा रेशीम विभागाने लक्ष्यांकापेक्षा अधिक नोंदणी केली असल्याचे चित्र आहे.

जिल्ह्यात रेशीम शेतीला चालना मिळण्यासाठी रेशीम संचालनाल विविध योजना राबवत असते. त्यामुळे शेतकरी रेशीम शेतीकडे वळाले आहेत. जिल्ह्यातील तासगाव, खानापूर, जत, आटपाडी, कवठेमहांकाळ आणि मिरज तालुक्यात रेशीम शेती करणाऱ्या शेतकऱ्यांची संख्या अधिक असल्याने कोषांचे उत्पादन वाढ आहे.

गतवर्षीही महारेशीम अभियान अंतर्गत रेशीम विभागाला ३०० एकर, कृषी विभाग २०० आणि जिल्हा परिषदेकडे ३०० एकर असे एकूण ७०० एकरांवरचे लक्ष्यांक होते. यादरम्यानही रेशीम विभागाने ४०४ एकरांवर तुती लागवडीसाठी शेतकऱ्यांनी नोंदणी केली होती. गेल्या वर्षी कृषी विभाग आणि जिल्हा परिषदेनेही तुती लागवडीसाठी शेतकऱ्यांच्या नोंदणी करण्यासाठी पुढाकार घेतला नव्हता.

यंदा म्हणजे २०२५-२६ या आर्थिक वर्षात महारेशीम अभियान अंतर्गत जिल्ह्यात ७०० एकरांवर तुती लागवडीचे लक्ष्यांक दिले होते. त्यामध्ये रेशीम विभागाला २०० एकर, कृषी विभाग ३०० तर जिल्हा परिषदेकडे २०० अशी लक्ष्यांकाची विभागणी होती. त्यानुसार तुती लागवड करण्यासाठी शेतकऱ्यांमध्ये प्रोस्ताहन करण्यासाठी प्रचार प्रसिद्धी करण्यात आली होती.

जिल्हा रेशीम विभागाने २४६ शेतकऱ्यांनी २५७ एकरांवर तुती लागवडीसाठी नोंदणी केली आहे. रेशीम विभागाने उद्दिष्टापेक्षा ४६ शेतकऱ्यांनी नोंदणी केली आहे. या योजनेत तीनशे शेतकरी तुती लागवडीसाठी नोंदणी होईल, असा अंदाज रेशीम विभागाने केला आहे.

दरम्यान, रेशीम विभागाकडून कृषी विभाग आणि जिल्हा परिषदेने या योजनेत शेतकऱ्यांची नोंदणी करण्यासाठी पुढाकार घ्यावा असे आवाहनही करण्यात आले. मात्र, या दोन्ही विभागांनी याकडे दुर्लक्ष केले आहे. सलग दुसऱ्या वर्षी कृषी विभाग आणि जिल्हा परिषदेने या योजनेत शेतकऱ्यांची नोंदणी करण्यासाठी जाणीवपूर्वक पाठ फिरवली असल्याचे चित्र आहे.