Latur News : जिल्ह्यात ९ जानेवारी ते ९ फेब्रुवारी दरम्यान कालावधीत महारेशीम अभियान २०२५ राबविण्यात येत आहे. या अंतर्गत रेशीम शेतीविषयी जनजागृतीसाठी जिल्हा रेशीम कार्यालयाने रेशीम रथ तयार केला आहे. जिल्हाधिकारी वर्षा ठाकूर-घुगे यांनी रेशीम रथाला हिरवी झेंडी दाखवून जनजागृती व नाव नोंदणी मोहिमेचा शुभारंभ केला.
यासोबत रेशीम शेतीविषयी तयार करण्यात आलेल्या घडीपुस्तिकेचे प्रकाशनही करण्यात आले. यंदा जिल्ह्यात सव्वातीनेशे एकरावर तुती लागवडीचे उद्दिष्ट असल्याची माहिती जिल्हा रेशीविकास अधिकारी एस. बी. वराट यांनी या वेळी दिली.
रोहयोच्या उपजिल्हाधिकारी अहिल्या गाठाळ, जिल्हा अधीक्षक कृषी अधिकारी रमेश जाधव, आत्माचे प्रकल्प संचालक शिवसांब लाडके, रोहयोचे गटविकास अधिकारी संतोष माने, जिल्हा रेशीम कार्यालयाचे व्ही. एन. पेठकर यांच्यासह रेशीम उत्पादक शेतकरी उपस्थित होते. रेशीम ही कमी पाणी, कमी खर्च, कमी कष्ट व कमी काळात उत्पन्न देणारे पीक आहे.
जिल्ह्यातील शेतकऱ्यांसाठी रेशीम शेती उपयुक्त ठरणार आहे. त्यामुळे जिल्ह्यातील जास्त जास्त शेतकऱ्यांपर्यंत पोहचून रेशीम शेतीची माहिती द्यावी. यामध्ये ज्या गावामध्ये रेशीम शेतीला सुरवात झाली आहे,
अशा गावांच्या आजूबाजूंच्या गावावर लक्ष केंद्रित करून क्लस्टर स्वरूपात रेशीम शेतीचा प्रसार करण्यावर भर द्यावा. सध्या रेशीम शेती करीत असलेल्या शेतकऱ्यांनीही आपल्या गावातील इतरही शेतकऱ्यांना रेशीम शेती करण्यासाठी प्रोत्साहित करावे, असे आवाहन जिल्हाधिकारी ठाकूर यांनी या वेळी केले.
अभियानात शेतकऱ्यांना रेशीम शेतीचे महत्त्व समजावून सांगण्यासोबतच इच्छुक शेतकऱ्यांची नाव नोंदणी करून घेण्यात येणार आहे. रेशीम शेतीसाठी अत्यल्प व अल्पभूधारक शेतकऱ्यांना महात्मा गांधी राष्ट्रीय ग्रामीण रोजगार हमी योजनेतून प्रती एकरी ४ लाख १८ हजार रुपये अनुदान देण्यात येणार आहे. इतर शेतकऱ्यांना सिल्क समग्र-२ योजनेतून प्रतिएकरी ३ लाख ७५ हजार रुपये अनुदान देय असल्याची माहिती वराट यांनी दिली.
रेशीमशेतीसाठी यांना संपर्क साधा
रेशीम शेती करण्यास इच्छुक शेतकऱ्यांनी नोंदणी व अधिक माहितीसाठी जिल्हा रेशीम कार्यालयातील वरिष्ठ तांत्रिक सहाय्यक व्ही. पेठकर (९३७०९३७५९२), क्षेत्र सहायक एस. आर. सुरनर (७५०७६५७४२०), लातूर, अहमदपूर व देवणी तालुक्यातील शेतकऱ्यांनी मनरेगा तांत्रिक सहायक एस. व्ही. पवार (८६२३००२२४०), रेणापूर, शिरूर अनंतपाळ व उदगीर तालुक्यातील शेतकऱ्यांनी मनरेगा तांत्रिक सहायक आर. ए. कदम (८७९३८१३२२६), औसा व निलंगा तालुक्यातील शेतकऱ्यांनी मनरेगा तांत्रिक सहायक आर. एन. देशमुख (७३५०५०५८७३) तर चाकूर व जळकोट तालुक्यातील शेतकऱ्यांनी मनरेगा तांत्रिक सहायक आर. बी. वाघमारे (८८८८२८२५३०) यांच्याशी संपर्क साधावा, असे आवाहन श्री. वराट यांनी या वेळी केले.
ॲग्रोवनचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.