Reshim Udyog : रेशीम उद्योगासाठीच्या परिसंवादात शेतकऱ्यांचा सहभाग

Beed News : रेशीम उद्योगातील शेतकऱ्यांसाठी ग्लोबल विकास ट्रस्टच्या वतीने शिरसाळा येथील कृषिकुल प्रशिक्षण केंद्रात परिसंवाद आयोजित करण्यात आला होता. यामध्ये बीड, धाराशिव व परभणी जिल्ह्यांतील सुमारे ५०० प्रगतिशील व नव्याने रेशीम लागवड करू इच्छिणारे शेतकरी सहभागी झाले होते.

या परिसंवादाला प्रमुख मार्गदर्शक म्हणून रेशीम संचालनालयाचे उपसंचालक डॉ. एम. बी. ढवळे यांनी शेतकऱ्यांना रेशीम उद्योगातील संधी, शासनाच्या विविध योजना आणि रेशीम शेती ही पर्यावरणपूरक आणि शाश्वत उत्पन्न देणारी शेती कशी आहे याविषयी सखोल मार्गदर्शन केले. वसंतराव नाईक मराठवाडा कृषी विद्यापीठ, परभणी येथील कीटकशास्त्र विभागाचे डॉ. लटपटे यांनी रेशीम पिकावरील कीड व रोग व्यवस्थापनाविषयी तज्ज्ञ मार्गदर्शन दिले.

बीडचे जिल्हा रेशीम अधिकारी श्री. वराड यांनी जिल्ह्यातील वाढता रेशीम व्यवसाय, त्यातील अडचणी व त्यावर उपाय याविषयी सविस्तर माहिती दिली. रेशीम सूत्र प्रायव्हेट लिमिटेडचे कुणाल वैद्य यांनी कोषांपासून धागा निर्मिती व त्यातील फायदे यावर अभ्यासपूर्ण सादरीकरण केले, तर शिवकुमार यांनी याविषयी प्रात्यक्षिक सत्र घेतले.

केंद्रीय रेशीम बोर्डचे अशोक जाधव (मेरा रेशम मेरा अभिमान) व डि सायंटिस्ट डॉ. एस. बी. मुरगोड, डॉ. विराज सोमकुमार यांनी शेतकऱ्यांना केंद्र शासनाच्या योजना व सहकार्याच्या संधी यांची माहिती दिली. ग्लोबल विकास ट्रस्टचे संस्थापक अध्यक्ष मयंक गांधी यांचे प्रभावी मार्गदर्शन झाले.

त्यांनी शेतकऱ्यांच्या अडचणी शासन दरबारी मांडण्याची ग्वाही देत, शेतकऱ्यांच्या हक्कासाठी खांद्याला खांदा लावून लढण्याचे आश्वासन दिले. ट्रस्टच्या माध्यमातून नानाजी देशमुख कृषी संजीवनी योजनेअंतर्गत रेशीम लागवड करणाऱ्या शेतकऱ्यांना सबसिडीवर आधारित कर्ज सुविधा देण्याची घोषणाही केली.

ग्लोबल विकास ट्रस्टचे संचालक डॉ. वांगे यांनी आभार प्रदर्शनादरम्यान शेतकऱ्यांना संस्थेच्या उपक्रमांमधून अधिकाधिक लाभ घेण्याचे आवाहन केले. कार्यक्रमादरम्यान परिसरातील प्रगतिशील शेतकऱ्यांचा सत्कार करण्यात आला.