Cotton Seeds Sale : हिंगोलीत खरिपाच्या ३३ हजार क्विंटलवर बियाण्याची विक्री

Hingoli News : हिंगोली जिल्ह्यात यंदाच्या (२०२४) खरीप हंगामात शुक्रवार (ता. १४)पर्यंत विविध पिकांचे मिळून ३३ हजार ६३३ क्विंटल बियाणे व कपाशी बियाण्याच्या ८५ हजार ५७२ पाकिटांची विक्री झाली आहे, अशी मागणी कृषी विभागाच्या सूत्रांनी दिली.

जिल्ह्यात यंदाच्या खरिपातील प्रस्तावित ३ लाख ११ हजार ४०४ हेक्टर क्षेत्रानुसार खासगी, तसेच सार्वजनिक क्षेत्रातील बियाणे उत्पादकांकडे विविध पिकांच्या ७१ हजार ५७ क्विंटल बियाणे तसेच कपाशी बियाण्याच्या १ लाख ६४ हजार ३४ पाकिटांची मागणी करण्यात आली होती.

त्यात सार्वजनिक बियाणे उत्पादकांकडे १० हजार ८२९ क्विंटल आणि खासगी कंपन्यांकडे ६० हजार २२७ क्विंटल बियाण्याचा समावेश आहे. शुक्रवार (ता.१४)पर्यंत सार्वजनिक क्षेत्रातील बियाणे उत्पादकांनी ३ हजार ७६५ क्विंटल आणि खासगी कंपन्यांनी ६२ हजार ९५५ क्विंटल मिळून एकूण ६६ हजार ७२० क्विंटल बियाण्याचा पुरवठा केला आहे.

त्यात ज्वारीचे ४६ क्विंटल, बाजरीचे ३० किलो, तुरीचे १ हजार ४४५ क्विंटल, मुगाचे १२५ क्विंटल, उडदाचे ९२ क्विंटल, मक्याचे ११ क्विंटल, सोयाबीनचे ६४ हजार ९९९ क्विंटल बियाणे, तसेच कपाशी बियाण्याची १ लाख २५ हजार १९६ पाकिटांचा समावेश आहे.

शुक्रवार (ता. १४)पर्यंत एकूण ३३ हजार ६३३ क्विंटल बियाण्याची तसेच कपाशी बियाण्याच्या ८५ हजारांवर पाकिटांची विक्री झाली. त्यात ज्वारीचे ७.५७ क्विंटल तुरीचे ६०१ क्विंटल, मुगाचे ५६.९० क्विंटल, उडदाचे ५१.४० क्विंटल, सोयाबीनचे ३२ हजार ९१६ क्विंटल बियाणे आहे.