Silk Cocoon Market: बीडमध्ये विक्रमी दीड लाख किलो रेशीम कोषांची आवक

Beed News: बीड येथील कृषी उत्पन्न बाजार समितीत २१ जुलै ते ४ ऑगस्ट या १३ दिवसांत विक्रमी १ लाख ५१ हजार ८३९ किलो रेशीम कोषांची आवक झाली. शिवाय सोमवारी (ता. ४) कमाल ६५० रुपये प्रतिकिलो उच्चांकी दर मिळाला.

याबाबत मिळालेल्या माहितीनुसार, बीड कृषी उत्पन्न बाजार समितीच्या यार्डात वस्त्रोद्योग संचालनालयाच्या मान्यतेने स्व. विनायकराव मेटे रेशीम कोष खरेदी-विक्री बाजारपेठ सुरू आहे. या बाजारपेठेत रेशीम कोष खरेदीसाठी रामनगर (कर्नाटक) पं. बंगाल, बेगलूर, भंडारा सांगली, लातूर, जालना, हींदपूर, चीकबालापूर, सीलगटा, तमिळनाडू, कानपूर, बेलगाम, हुबळी, गुलबर्गा, हैदराबाद, विजयवाडा येथील व्यापाऱ्यांसह स्थानिक व्यापारी येतात.

२०२१-२२ मध्ये ११८७ तर २०२२-२३ मध्ये ४८५० तसेच २०२३-२४ मध्ये ७३४० व डिसेंबर २०२४ पर्यंत ११,२८३ शेतकरी आपले रेशीम कोष विक्रीसाठी घेऊन आले होते. २१ जुलै ते ४ ऑगस्ट या १३ दिवसांत सुमारे १२३४ शेतकऱ्यांनी एक लाख ५१ हजार ८३९ किलो ८०० ग्राम रेशीम कोष विक्रीला आणल्याची माहिती बाजार समितीकडून देण्यात आली.

या २१ व २८ जुलै या कालावधीत प्रत्येकी २४ हजार किलोच्या पुढे कोषांची आवक झाली, जी विक्रमी होती. सोमवारी (ता. ४) बाजारपेठेत ११३ शेतकऱ्यांनी १०,९१२ किलो ८०० ग्रॅम कोष विक्रीसाठी आणले. उच्चांकी ६५० रुपये प्रतिकिलो दर मिळाला.