Silk Cocoon Market: अडीच वर्षांतच रेशीम कोष बाजाराला टाळे लागण्याची वेळ

Amravati News: विदर्भातील विशेषतः आत्महत्याग्रस्त पश्चिम विदर्भातील शेतकऱ्यांना पारंपरिक पिकांसोबत पूरक व्यवसायासाठी रेशीम शेतीचा पर्याय आहे. या व्यवसायास चालना मिळावी, यासाठी बाजारपेठ उपलब्ध करून देण्यासाठी अडीच वर्षांपूर्वी बडनेरा येथे उभारण्यात आलेल्या रेशीम कोष बाजाराला आता टाळे लागण्याची वेळ आली आहे. प्रशासकीय दुर्लक्षासह रेशीमचा दर्जा व भाव, यामुळे हा बाजार अडीच वर्षांतच हेलकावे खाऊ लागला आहे.

विदर्भातील पहिला रेशीम कोष बाजार कृषी उत्पन्न बाजार समितीच्या बडनेरा येथील उपबाजारात सहा डिसेंबर २०२२ ला सुरू करण्यात आला होता. अमरावती जिल्ह्यासह लगतच्या जिल्ह्यात बऱ्याच ठिकाणी रेशीम उत्पादन घेतले जाते. बाजारपेठ नसल्याने कोष निर्मिती झाल्यानंतर विक्रीसाठी चांगलाच त्रास होत होता. शेतकऱ्यांना त्यासाठी हैदराबाद, बंगळूर, कोलकाता येथील बाजारपेठेत जावे लागत होते. स्थानिक पातळीवर बाजारपेठ मिळाल्यास या उद्योगाला अधिक चालना येईल, या उद्देशातून कृषी उत्पन्न बाजार समिती व रेशीम प्रादेशिक कार्यालयाने बडनेरा येथील उपबाजारात रेशीम बाजार स्थापन केला.

बडनेरा शहर दळणवळणाच्या दृष्टीने सोईस्कर आहे. राष्ट्रीय महामार्गावर हे शहर असून रेल्वेची सुविधा आहे. बडनेरा येथे प्रमुख रेल्वे स्थानक असल्याने येथील बाजारात मोठ्या शहरातील व्यापाऱ्यांनी यावे म्हणून हा बाजार स्थापण्यात आला. सहा डिसेंबर २०२२ ला स्थापन झालेल्या या बाजारात पहिल्याच दिवशी रेशीम कोषाला ६०० ते ६६० रुपये प्रतिकिलो भाव मिळाला. एकूण ४ लाख ९९ हजार रुपयांची उलाढाल या बाजारात झाली. हक्काची बाजारपेठ उपलब्ध झाल्याने शेतकरी समाधानी होते.

प्रारंभी शेतकऱ्यांकडून या बाजाराला कमी प्रतिसाद मिळाला. त्यानंतर मात्र तो वाढला. परराज्यांतूनही व्यापारी खरेदीसाठी येऊ लागले. रेशीम कोषाला योग्य दर मिळावा, अशी उत्पादकांची अपेक्षा होती. परंतु कोषाचा दर्जा कमी असल्याने व्यापारी त्याला दर देईनासे झाले. अखेर रेशीम माल खरेदी-विक्रीच्या दृष्टीने अतिशय सोईस्कर असलेला हा रेशीम बाजार मात्र अडीच वर्षांतच गुंडाळण्याच्या स्थितीत आला आहे.