Pune Weekly Market: पुणे शहरात ४ ठिकाणी सुरू होणार आठवडी बाजार

Pune News: जागतिक बँक आणि राज्य शासनाच्या माध्यमातून पुणेकरांना थेट शेतकऱ्यांच्या शेतातून सेंद्रिय भाजीपाला आणि फळे उपलब्ध करून देण्यासाठी महापालिकेकडून शहरात चार ठिकाणी आठवडी बाजार सुरू केले जाणार आहेत.

महापालिकेच्या हद्दीतील अॅमेनिटी स्पेस लोहगाव, बाणेर, पाषाण, बावधन-बालेवाडी या ठिकाणची जागा शेतकरी आठवडे बाजारासाठी निवड करण्यात आली आहे. तसेच, पुढील दोन महिन्यांत हे सर्व बाजार सुरू करण्याचे महापालिका प्रशासनाचे नियोजन असल्याची माहिती महापालिका अतिरिक्त आयुक्त पृथ्वीराज बी. पी. यांनी दिली.

शासनाच्या माध्यमातून संत शिरोमणी सावतामाळी रयत बाजार अभियान राबविले जात आहे. त्या अंतर्गत जागतिक बँकेच्या मदतीतून बाळासाहेब ठाकरे कृषी व्यवसाय व ग्रामीण परिवर्तन प्रकल्प (स्मार्ट) राबविण्यात येत आहे. या अंतर्गत हे आठवडे बाजार उभारले जाणार आहेत.

शेतकरी आठवडे बाजारांच्या दर्जामध्ये सुधारणा करून, शहरी भागातील ग्राहकांना रसायन अवशेष मुक्त आणि ताजी फळे व भाजीपाला वाजवी दारात उपलब्ध व्हावा व शेतकऱ्यांच्या शेतमालाला चांगला दर मिळावा, तसेच वाहतूक कोंडी कमी व्हावी हा उद्देश आहे. शासनाच्या कृषी तंत्रज्ञान व्यवस्थापन यंत्रणातर्फे (आत्मा) निवड केलेल्या समुदाय आधारित संस्था, शेतकरी उत्पादक कंपनी यांना या बाजारात विक्रीसाठी संधी देण्यात येणार आहे.