Shaktipeeth Highway: शक्तिपीठ महामार्गाविरोधात शुक्रवारी १२ जिल्ह्यांत आंदोलन

Kolhapur News: शक्तिपीठ महामार्गाविरोधात शुक्रवारी (ता. २४) राज्यव्यापी आंदोलन करण्याचा निर्धार शुक्रवारी (ता.१७) करण्यात आला. या वेळी १२ जिल्ह्यांतील जिल्हाधिकारी कार्यालयासमोर आंदोलन करण्याचेही ठरले.

महामार्गात बाधित होणाऱ्या १२ जिल्ह्यांतील आंदोलक प्रतिनिधींची ऑनलाइन बैठक घेण्यात आली. अध्यक्षस्थानी शक्तिपीठ विरोधी संघर्ष समितीचे निमंत्रक गिरीश फोंडे होते.श्री. फोंडे म्हणाले, ‘‘विधानसभा निवडणुकीनंतर शक्तिपीठ महामार्ग रेटण्यासाठी फक्त कोल्हापुरातून विरोध होत असून, इतर जिल्ह्यांतून विरोध होत नाही,

असा खोटा प्रसार राज्य सरकारकडून केला जात आहे. यापूर्वी कोल्हापूरसह इतर जिल्ह्यांमध्ये आंदोलन सुरू होते व आताही सुरू आहे. या सरकारला कंत्राटदारांचे भले करण्यासाठी व उद्योगपतींना नैसर्गिक साधन संपत्ती, खनिज संपत्तीची लूट करण्यासाठी हा महामार्ग म्हणजे रेड कार्पेट आहे.’’

या वेळी नांदेडचे गोविंद घाटोळ, लातूरचे गजेंद्र येळकर यांनी भूमिका मांडली. सतीश कुलकर्णी, शांतिभूषण कच्छवे, अभिजित देशमुख, गणेश घोडके, सुभाष मोरलवार, गजानन तीमेवार, केतन सारंग, भारत महाजन, सुदर्शन पडवळ, संभाजी फरताळे, अनिल बेळे, केदारनाथ बिडवे, श्रीधर माने, संतोष ब्याळे, सतीशराव घाडगे, सुनील भोसले, मेहताब पठाण, रवी मगर, परमेश्‍वर मोठे, बसवराज झुंजारे, नानासाहेब चव्हाण, रामेश्‍वर चव्हाण, उमेश एडके, प्रकाश पाटील, सुरेश राजापूरकर आदी उपस्थित होते.