Soybean Market : सोयाबीन उत्पादकांना भाव फरक तातडीने द्यावा

Buldana News : यंदा सोयाबीनच्या शासकीय खरेदी केंद्रांकडे शेतकऱ्यांनी पाठ फिरवली. कुठल्याही केंद्रांवर खरेदी होताना दिसत नाही. त्यामुळे शासनाने एकतर या खरेदीविषयी विश्‍वास निर्माण करावा किंवा शेतकऱ्यांना भावफरक तातडीने खात्यात द्यावा, अशी मागणी चिखली बाजार समितीचे माजी सभापती डॉ. सत्येंद्र भुसारी यांनी केली आहे.

याबाबत त्यांनी म्हटले, की सोयाबीनला बाजारात ४२०० रुपये एवढा कमी भाव असताना आणि शासकीय हमीभाव ४८९२ रुपये असतानाही नाफेडच्या शासकीय खरेदी केंद्रावर अजूनही खरेदी सुरू झाल्याचे चित्र दिसत नाही.

बुलडाणा जिल्ह्यात सर्वदूर अशीच परिस्थिती आहे. वास्तविक सध्या सोयाबीन हेच एक महत्त्वाचे पीक आहे. पीकपेऱ्यापैकी खरिपातील जवळपास ७० टक्के पेरा सोयाबीनचा असतो.

सरकारने हमीभावाची योजना जाहीर केली आणि सोयाबीन नोंदणी करण्याचे आवाहन केले होते. तरी शेकडा १० टक्के लोकांनी सुद्धा अजूनपर्यंत नोंदणी केल्याचे दिसत नाही. बुलडाणा जिल्ह्यातील चिखली तालुक्यात पाच ते सहा हमीभाव खरेदी केंद्र आहेत. त्यापैकी केवळ एकमेव खरेदी केंद्र प्रत्यक्ष सुरू झाले आहे.

तिथेही आतापर्यंत नावापुरतीच खरेदी झाल्याचे दिसून येते. इतर खरेदी केंद्रावर तर उद्‌घाटनालाही सोयाबीन आल्याचे दिसत नाही. चिखली तालुक्यात जवळपास ६० हजारांवर शेतकऱ्यांनी सोयाबीनची पेरणी केली असेल आणि प्रत्यक्षात मात्र पाच हजार शेतकऱ्यांनीही नोंदणीसुद्धा केली नाही, यावरून प्रतिसाद लक्षात येतो.