Shaktipeeth Highway: शक्तिपीठ मार्गाविरोधात सिंधुदुर्गात आंदोलनाची तयारी

Sindhudurg News: शक्तिपीठ मार्गाविरोधात सिंधुदुर्गातील शेतकरी आंदोलनाची तयारी करू लागले असून, आंबोली (ता. सावंतवाडी) ग्रामस्थ एकवटले आहेत. त्यामुळे येत्या काळात या मार्गाविरोधात आंदोलन उभे राहण्याची चिन्हे दिसू लागली आहेत.

नियोजित शक्तिपीठ मार्गाविरोधात कोल्हापूर, सांगलीसह विविध भागांत आंदोलने झाली आहेत. मात्र आतापर्यंत सिंधुदुर्ग जिल्ह्यात कोणत्याही हालचाली दिसून येत नव्हत्या. परंतु आता या मार्गाविरोधात आंदोलनाची तयारी सुरू झाली आहे. नागपूर ते गोवा असा हा शक्तिपीठ मार्ग होत असून कोल्हापूर जिल्ह्यातून सिंधुदुर्ग जिल्ह्यात हा महामार्गाचा प्रवेश होणार आहे.

हा महामार्ग गेळे, आंबोली, पारपोली, वेर्ले, उडेली, फणसवडे, घारपी, फुकेरी, तांबोळी, डेगवे, बांदा या गावांतून जात आहे. या महामार्गावरील आंबोलीतील शेतकऱ्यांनी महामार्गास विरोध करण्यास सुरुवात केली आहे.

येथील शेतकऱ्यांची एक बैठक देखील झाली. या बैठकीत शेतकऱ्यांनी सुरुवातीला येथील कबुलायतदार गावकर प्रश्न सोडवावा त्यांनी शक्तिपीठ महामार्गाचा विचार करावा. जोपर्यंत हा प्रश्न सुटत नाही तोपर्यंत आमचा विरोध कायम राहणार आहे. काही दिवसांपूर्वी सिंधुदुर्गातील महामार्गाचा सर्व्हेक्षण करण्यात आले असून हद्द निश्‍चित करण्यात आली आहे. त्यामुळे विश्‍वासात न घेता ही हद्द निश्‍चित केली असल्याचा आरोप ग्रामस्थांकडून सुरू आहे.