Manikrao Kokate : जालना जिल्ह्यात पोकरा योजनेमध्ये झालेल्या गैरव्यवहारावर चौकशी अहवालानंतर कारवाई करण्यात येईल, अशी माहिती राज्याचे कृषिमंत्री माणिकराव कोकाटे यांनी आज (ता.८) विधानपरिषदेत दिली. जालना जिल्ह्यामध्ये पोकरा योजनेंतर्गत शेडनेट घोटाळा झाल्याचा मुद्दा विधानपरिषदेचे विरोधीपक्ष नेते अंबादास दानवे यांनी उपस्थित केला. या चर्चेत भाजपचे आमदार सदाभाऊ खोत, कॉँग्रेसचे नेते भाई जगताप यांनी सहभाग घेतला.
जालना जिल्ह्यातील उपविभागीय कृषी अधिकारी शीतल चव्हाण यांच्या तक्रारी असूनही त्यांना विभागीय पदोन्नती कशी देण्यात आली, असा सवालही दानवे यांनी उपस्थित केला. त्यावर उत्तर देताना कृषिमंत्री म्हणाले, "विभागीय समितीच्या १० जुलै २०२३ च्या बैठकीत चव्हाण यांना पदोन्नती देण्यात आली. परंतु त्यानंतर तक्रारी प्राप्त झाल्या. मात्र केवळ तक्रारीवर पदोन्नती थांबवता येत नाही. परंतु याची चौकशी सुरू आहे, चौकशी अहवालानंतर कारवाई करू." असंही कृषिमंत्री कोकाटे यांनी सांगितलं.
यावर भाजपचे आमदार सदाभाऊ खोत यांनी कारवाईला दिरंगाई करण्यावरून कृषिमंत्र्यांना सवाल केला. खोत यांच्या प्रश्नाला उत्तर देताना कृषिमंत्री म्हणाले, "जबाबदार अधिकाऱ्यांना निलंबित करण्यात आलं आहे. त्यांच्यावर पुढील कारवाई करण्यासाठी चौकशी सुरू आहे. चौकशीमध्ये ३ हजार २५८ पैकी २ हजार ३५८ प्रकरणं पूर्ण झालं आहे. ९०० शेडनेटची चौकशी बाकी आहे. ती तपासणी सुरू असून १५ दिवसांत अहवाल येईल. अहवाल आल्यानंतर कारवाई करण्यात येईल." असंही कृषिमंत्री कोकाटे यांनी सांगितले.
संबंधित अधिकाऱ्यांवर फौजदारी गुन्हा का दाखल करण्यात आला नाही. फौजदारी गुन्हा आणि विभागीय चौकशीचा काही संबंध नाही, असा मुद्दा कॉँग्रेसचे आमदार भाई जगताप यांनी उपस्थित केला. त्यावर उत्तर देताना कृषिमंत्र्यांनी अहवाल आल्यानंतर तत्काळ कारवाई करून फौजदारी गुन्हा दाखल करण्यात येईल, अशी ग्वाही कृषिमंत्र्यांनी दिली.
दरम्यान, मुंबई कार्यालयाच्या दक्षता पथकाने डिसेंबर २०२३ मध्ये तपासणी केली. प्रकल्प संचालकाने २०२४ मध्ये लेखा परीक्षण अहवाल सादर केला आहे. दोन्ही अहवाल कृषी विभागाकडे आले असतील तर आणि त्यामध्ये गैरव्यवहार झाल्याचं निष्पन्न झालं आहे. तर जबाबदार अधिकाऱ्यांवर कारवाई का करण्यात आली नाही. यावर कृषिमंत्र्यांनी चौकशी नंतरच कारवाई करण्यात येईल असं स्पष्ट केलं.
ॲग्रोवनचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.