Akola News : राज्यातील कृषी विभागात काही दिवसांपूर्वी मोठ्या प्रमाणावर बदल्या करण्यात आल्या असून, अकोला, बुलडाणा जिल्ह्यांत पहिल्यांदा जवळपास सर्वच ठिकाणी नेमणुका करण्यात आल्या. बदल्या झालेले बरेच अधिकारी पदभार देऊन गेले. मात्र, त्या जागेवर बऱ्याच ठिकाणी अधिकारी रुजू झालेले नसल्याचे दिसून येत आहे.
एकीकडे तालुका कृषी अधिकारी पदे भरण्यात आली तर मंडळ अधिकाऱ्यांची पदे बऱ्याच ठिकाणी रिक्त ठेवण्यात आली आल्याचेही चित्र आहे. अकोला व बुलडाणा जिल्ह्यांतील कार्यकाळ पूर्ण झालेल्या तालुका कृषी अधिकाऱ्यांच्या पदांवर नव्या नेमणुका देण्यात आल्या.
या बदल्यांनंतर काही अधिकारी आपल्या पदस्थितीच्या ठिकाणी रुजूही झाले असले तरी बरेच अधिकारी अद्यापही रुजू झालेले नाहीत. त्यामुळे शेतकऱ्यांच्या कामांवर परिणाम होण्याची शक्यता वर्तवली जात आहे.
सध्या खरीप हंगामाची लगबग सुरू झाली असून, बी-बियाणे, खते, कृषी सल्ला, अनुदान यांसारख्या विषयांबाबत तालुका कृषी अधिकाऱ्यांची भूमिका अत्यंत महत्त्वाची असते. अशा परिस्थितीत काही तालुक्यांमध्ये अधिकारी हजर नसल्याने शेतकऱ्यांना वेळेवर सेवा मिळण्यात अडचणी येऊ शकतात. मूर्तिजापूर येथे दीपक तायडे हे रुजू झाले आहेत. पातूर, अकोट, अकोला या तालुक्यांत नवीन अधिकारी रुजू होण्याची प्रतीक्षा आहे.
जिल्ह्यात मंडळ कृषी अधिकाऱ्यांची पदे बरीच रिक्त ठेवलेली आहेत. बुलडाणा जिल्ह्यातही संग्रामपूर तालुका कृषी अधिकाऱ्यांची अमरावती येथे रामेतीला बदली करण्यात आली. त्यांच्या जागेवर नियुक्त केलेले अधिकारी रुजू झालेले नाहीत.
चिखली, सिंदखेडराजा येथे नवीन अधिकारी आलेले नाहीत. काही ठिकाणी बदली होऊन येत असलेल्या अधिकाऱ्यांना ते कार्यरत असलेल्या मूळ ठिकाणावरून कार्यमुक्त केले नसल्यानेही रुजू होण्यास विलंब होत असल्याचा दावा कृषी विभागातून होतो आहे.
बदलीनंतर काही दिवसात नव्या ठिकाणी रुजू होण्यासाठी वेळ दिला जातो. मागील काही वर्षे या भागात तालुका कृषी अधिकाऱ्यांची अनेक पदे रिक्त ठेवलेली होती. पहिल्यांदा सर्वच ठिकाणी कृषी आयुक्तालयाने अधिकारी देत अनुशेष दूर करण्याचा प्रयत्न केला आहे.
आता फक्त अधिकारी रुजू होऊन कामकाजाला गती देण्याची आवश्यकता आहे. परंतु काही जण परस्पर बदल्यांच्या मूडमध्ये असल्याचे दिसून येत आहे. किती अधिकारी बदलीनुसार नव्या ठिकाणी येतात हे लवकरच स्पष्ट होईल.
ॲग्रोवनचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.