Tur Crop : खानदेशात तूर पीक जोमात

Jalgaon News : खानदेशात पूर्वहंगामी किंवा बागायती व कोरडवाहू तूर पीक जोमात आहे. पीकस्थिती चांगली आहे. शेतकरी अळीनाशके, बुरशीनाशके, कीटकनाशकांची फवारणी त्यात घेत आहेत.

तूर लागवड खानदेशात यंदा स्थिर आहे. मागील हंगामात कमी पावसातही तूर पीक बऱ्यापैकी आले. तसेच तुरीला दरही चांगले मिळाले. तूर दर टिकून होते. यामुळे यंदा अनेक शेतकरी तूर पिकाकडे वळले. तुरीची लागवड यंदा वाढली. जळगाव जिल्ह्यातील लागवड १२ हजार हेक्टरवर पोचली आहे. अनेकांनी तूर व सोयाबीनचे मिश्र पीक घेतले आहे.

धुळे व नंदुरबारात मिळून सुमारे १२०० हेक्टरवर तूर लागवड झाली आहे. जळगाव जिल्ह्यातील रावेर, मुक्ताईनगर, बोदवड, जामनेर, अमळनेर आदी भागात अनेकांनी मुख्य पीक म्हणून तूर लागवड केली आहे.

धुळ्यातील शिरपूर, शिंदखेडा, साक्री, नंदुरबारातील नंदुरबार, नवापूर भागात तूर पीक अधिक आहे. जळगावातील रावेल, मुक्ताईनगर आदी भागात जूनमध्येच ठिबक सिंचन यंत्रणेच्या साह्याने पूर्वहंगामी तुरीची जूनमध्ये लागवड झाली आहे.

पाऊसमान चांगले राहिल्यास पीकस्थिती आणखी सुधारले. कोरडवाहू क्षेत्रातील तूरही जोमात आहे. पण पावसाची गरज आहे. अनेकांनी दोन वेळेस तुरीला बेसल डोस दिला आहे. तसेच उष्णता, ढगाळ व विषम वातावरण अनेक दिवस राहिल्याने किडींची समस्याही आहे. यामुळे तूर पिकात फवारण्याही घ्याव्या लागल्या आहेत.

फवारणीतूनही विविध खते शेतकऱ्यांनी तूर पिकास दिली आहेत. पूर्वहंगामी तूर पिकाची चांगली वाढ बैलांकरवी आंतरमशाग झाली आहे. तणनियंत्रणाची कार्यवाही शेतकऱ्यांनी करून घेतली आहे. मागील काही दिवसांपासून खानदेशात पाऊस नाही. पाऊस नसल्याने पिकात फवारणीची कामेही मागील सात ते आठ दिवसांत गतीने झाली आहेत. हलक्या, मध्यम जमिनीत तुरीचे सिंचन करावे लागेल.