Jalgaon News : खानदेशात पूर्वहंगामी तूर लागवड पूर्ण झाली आहे. लागवडीत बऱ्यापैकी घट दिसत असून, जळगाव जिल्ह्यातील लागवड सुमारे पाच हजर हेक्टरपर्यंत आहे. पुढे कोरडवाहू क्षेत्रात तूर लागवड होईल. यामुळे लागवडीखालील क्षेत्र वाढेल. पण मागील हंगामाच्या तुलनेत तूर पीक कमी राहील, अशी स्थिती आहे.
पूर्वहंगामी किंवा बागायती तूर लागवड मुक्ताईनगर व रावेरात अधिक आहे. धुळ्यातील शिंदखेडा व धुळे भागातही पूर्वहंगामी तूर आहे. नंदुरबारमध्ये मात्र पूर्वहंगामी तूर अल्प आहे. पुढे कोरडवाहू तूर लागवड होईल. परंतु क्षेत्रात मागील हंगामाच्या तुलनेत घट शक्य आहे. जळगाव जिल्ह्यात मागील हंगामात ११ हजार हेक्टरवर तूर पीक होते. धुळे व नंदुरबारमध्ये मिळून सुमारे चार हजार हेक्टरवर तूर लागवड झाली होती.
परंतु यंदा तूर लागवड कमी होईल, असे संकेत आहेत. कोरडवाहू क्षेत्रातील लागवड पाऊस फारसा नसल्याने कमी आहे. परंतु बागायती तूर लागवड पूर्ण झाली आहे. अनेकांनी गादीवाफा व ‘ठिबक’वर तूर लागवड केली आहे. पूर्वहंगामी तूर पीक चांगले वाढत आहे. त्यात पाऊस आल्यानंतर उडीद किंवा सोयाबीनची पेरणी अनेक शेतकरी करतील, असे दिसत आहे. तसेच काही शेतकरी पाऊस लांबल्यास उडीद, सोयाबीनऐवजी मका लागवडीची तयारी करीत आहेत.
पूर्वहंगामी तूर पीक मुक्ताईनगरात अधिक आहे. मुक्ताईनगरमधील तापी व पूर्णा नदीच्या क्षेत्रात तूर पीक आहे. त्यात वायला टाकळी, कुऱ्हा, चिंचखेडा, अंतुर्ली, नायगाव, धाबे, पिंप्रीनांदू, बेलसवाडी, कर्की, चांगदेव, चिंचोल आदी भागांत तूर पीक आहे. रावेरातील सातपुडालगत आणि तापी काठालगतच्या गावांतही बागायती तूर आहे.
अन्य शेतकऱ्यांनी कापूस पिकात तूर लागवड केली आहे. अनेकांचे बागायती तूर पीक १० ते १२ दिवसांचे झाले आहे. चांगले बीजांकुरण झाल्यानंतर त्यात एक वेळेस तणनियंत्रणाचे कामही झाले आहे. तसेच नांग्या भरण्याचे कामही शेतकऱ्यांनी उरकले आहे. काही भागात तूर लागवडीनंतर त्यावर किडींनी हल्ला केल्याने पुनर्लागवडही करावी लागली आहे. यामुळे पिकात तूर येईल, असेही शेतकऱ्यांचे म्हणणे आहे.
पुढे पाऊस लांबल्यास कोरडवाहू तूर लागवड वाढेल. यामुळे तुरीचे क्षेत्र पूर्वीएवढेच किंवा किंचित कमी होईल, असाही नवा अंदाज आहे. कारण उशिरा पेरणीत सोयाबीन, उडीद, मूग पीक हवे तसे येत नाही. कापूस लागवडही उशिरा पेरणीत यशस्वी होत नाही. यामुळे तुरीस पसंती मिळेल, असेही सांगितले जात आहे.
ॲग्रोवनचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.