Orange Disease: संत्रापट्ट्यातील बागांना ग्रासले फायटोप्थोराने

Amravati News: संत्रा उत्पादकांच्या मागील शुक्‍लकाष्ठ संपता संपत नसल्याचे चित्र आहे. यंदा पोषक वातावरणाच्या परिणामी आंबिया बहराचा हंगाम समाधानकारक राहण्याची अपेक्षा होती. मात्र संत्रापट्ट्यात फायटोप्थोरा रोगाचे प्रमाण वाढीस लागले आहे. त्या कारणामुळे उत्पादकता प्रभावीत होण्याची भीती वर्तविली जात असल्याने शेतकऱ्यांच्या चिंतेत भर पडली आहे.

राज्यात सुमारे दीड लाख हेक्‍टरवर संत्रा लागवड क्षेत्र असून त्यापैकी सर्वाधिक एक लाख हेक्‍टर क्षेत्र हे एकट्या अमरावती जिल्ह्यात आहे. २५ हजार हेक्टर उर्वरित महाराष्ट्रात तर २५ हजार हेक्‍टर नागपूर जिल्ह्यात लागवड आहे. अशाप्रकारे संत्रा लागवड क्षेत्राचे वर्गीकरण केले जाते. विदर्भाचे मुख्य फळपीक असलेल्या संत्र्यावर आधारित प्रक्रिया उद्योगाची वानवा होता. त्यामुळे एकूण दहा लाख टन उत्पादनापैकी २५ ते ३० टक्‍के मिळणाऱ्या लहान आकाराच्या संत्रा फळांचे काय करायचे, हा प्रश्‍न दरवर्षी गंभीर होत होता.

त्यामुळे प्रक्रिया उद्योगाची मागणी सातत्याने होत होती. केंद्रिय मंत्री नितीन गडकरी यांच्या पुढाकाराने नागपूरच्या मिहान परिसरात पतंजलीच्या फूडपार्कची उभारणी झाली. या ठिकाणी लहान आकाराच्या संत्रा फळांवर प्रक्रिया होणार असल्याने आता अशी सत्रा फळे न फेकता त्यातूनही परतावा मिळणार आहे. ही समाधानाची बाब असतानाच संत्रापट्ट्यात यंदा फायटोप्थोराचा प्रादुर्भाव दिसून येत असल्याचे शेतकऱ्यांची चिंता वाढली आहे.

फायटोप्थोरा प्रादुर्भावग्रस्त बागांमध्ये झाडाचा अन्नद्रव्याचा पुरवठा प्रभावीत होतो. त्यामुळे झाड वाळते व ते उत्पादनक्षम राहत नाही. चांदूरबाजारसह जिल्ह्याच्या विविध भागात ही समस्या गंभीर झाली आहे. सुमारे ४० टक्‍के बागा फायटोप्थोराच्या परिणामी बाधित झाल्याचा दावा त्या भागातील शेतकऱ्यांनी केला आहे. त्याचा परिणाम आंबिया बहारातील फळांच्या उत्पादकतेवर होणार आहे. त्यामुळे यंदाच्या आंबिया बहराच्या हंगामात फळांची उपलब्धता कमी राहील त्यातून बाजारपेठ तेजीत राहतील, असेही सांगितले जाते.