Orange Trade Fraud : चांदूरबाजारमध्ये संत्रा व्यापाऱ्याची ३२ लाखांची फसवणूक

Amaravati News : चांदूरबाजार तालुक्यात शिरजगावबंड येथील संत्रा व्यापाऱ्याची संत्राविक्री व्यवहारात ३२ लाख १२ हजार रुपयांनी फसवणूक झाली. रफिक खान नूर खान (वय ४५, रा. ताजनगर, चांदूरबाजार) असे फसवणूक झालेल्या व्यापाऱ्याचे नाव आहे.

रफिक खान हे संत्रा व्यापारी असून, त्यांनी शेतकऱ्यांकडून कोट्यवधींचा संत्रा माल खरेदी केला होता. त्यानंतर एजंट श्यामसुंदर याच्या माध्यमातून हा माल संशयित जय जगन्नाथ सहा (रा. श्रीपूर, कोलकाता, पश्चिम बंगाल) यांना ५७ लाख ३ हजार ३९४ रुपयांची मोसंबी व ६५ लाख ३३ हजार ४५६ रुपयांचा संत्रा, असा एकूण १ कोटी २२ लाख ३६ हजार ८५० रुपयांचा माल विकला.

त्यापैकी वेगळ्या तारखांना संशयित जय जगन्नाथ सहा (वय ४०) व एजंट श्यामसुंदर बालिक (दोघेही रा. श्रीपूर, कोलकाता, पश्चिम बंगाल) या दोघांकडून ९० लाख २२ हजार ६१० रुपये मिळाले.

उर्वरित ३२ लाख १४ हजार २४० रुपये संशयितांना सतत मागणी करूनसुद्धा देण्यास दोघांनी टाळाटाळ केली. आपली ३२ लाख १२ हजार रुपयांनी फसवणूक केली, असा त्यांचा आरोप आहे.

एजंट श्यामसुंदर बालिक यांच्या पावतीवर नमूद केल्याप्रमाणे रफिक खान यांनी हा माल निर्धारित ठिकाणी पाठविला होता, असे रफिक खान नूर खान यांनी चांदूरबाजार ठाण्यात दाखल तक्रारीत म्हटले.