Pandharpur Flood: पंढरपुरात चंद्रभागेला पूरस्थिती, मंदिरे पाण्याखाली

Pandharpur News: उजनी व वीर धरणातून मोठ्या प्रमाणावर सोडण्यात आलेल्या पाण्यामुळे चंद्रभागा नदी दुथडी भरून वाहत असून, पंढरपुरात पूरस्थिती निर्माण होण्याची शक्यता निर्माण झाली आहे. या पाण्यामुळे नदीने इशारा पातळी ओलांडली असून, जुना दगडी पूल, भक्त पुंडलिक मंदिरांसह इतर अनेक घाट पाण्याखाली गेले आहेत. 

उजनी धरणातून भीमा नदीत ७१,६०० क्युसेक आणि वीर धरणातून नीरा नदीत ३२,६६३ क्युसेकने विसर्ग सुरू करण्यात आला. नीरेचे पाणी माळशिरस तालुक्यातील संगम येथून पुढे भीमा नदीला मिळत असल्याने, दोन्ही धरणांमधून सोडण्यात आलेल्या पाण्याचा एकत्रित परिणाम पंढरपुरात भीमेकाठी मोठ्या पूरस्थितीत झाला आहे.

सध्या भीमा नदी १.१० लाख क्युसेकहून अधिक वेगाने वाहत आहे. चंद्रभागेतील पाणीपातळी ४४३ मीटरवर पोहोचली असून, ही इशारा पातळी आहे आणि ही पातळी सध्या ओलांडली गेली आहे. पुढच्या काही तासांत विसर्ग वाढल्यास नदी धोकापातळी ओलांडू शकते, असा इशारा प्रशासनाने दिला आहे.

नदीपात्रातील भक्त पुंडलिक मंदिर, प्रभूपाद घाट, गोपाळपूरचे विष्णुपद मंदिर, तसेच संत-साधूंच्या समाधी सध्या पाण्याखाली आहेत. जुना दगडी पूल साधारणतः २ मीटरपेक्षा अधिक पाण्याखाली आहे. पूरसदृश स्थितीची शक्यता लक्षात घेता प्रशासनाने चंद्रभागेवरील सर्व घाट बंद केले असून, आंबाई पटांगण व व्यासनारायण झोपडपट्टीसारख्या नदीकिनारी असलेल्या भागांतील नागरिकांचे स्थलांतर करण्यात आले आहे.

नागरिकांनी नदीपात्रात जाऊ नये, अशी सूचना तहसीलदार सचिन लंगोटे यांनी दिली आहे. त्याशिवाय पंढरपूर तालुक्यातील करोळे, पटवर्धन कुरोली, कौठाळी, गुरसाळे, पंढरपूर, गोपाळपूर, मुंढेवाडी, पुळूज येथील आठ बंधारे पाण्याखाली गेले आहेत. 

उजनी ९८ टक्क्यांवर

उजनी धरणाच्या वरच्या पाणलोट क्षेत्राकडून पाण्याचा विसर्ग धरणाकडे सुरूच आहे. त्यामुळेच धरणातून पुढे भीमा नदीत पाणी सोडण्यात येत आहे. परिणामी, धरणासह नदीतील पाणी पातळी मोठ्या प्रमाणात वाढली आहे. उजनी धरण मंगळवारी (ता. २९) ९७.५७ टक्के भरले असून, धरणात ११५.९३ टीएमसी पाणीसाठा राहिला. तर त्यापैकी ५२.२७ टीएमसी साठा उपयुक्त राहिला. दौंडकडूनही ५४ हजार ७८२ क्युसेकने आवक सुरू आहे.